Thingkung Hmui

Khangbor, 9.2.1981

Zaiin chawi ka tih I sak hming Thingkunghmui,
Tuk ram re ah suilung inruola,
Ram țuontu beisei le inghatna I nih,
Aw! I pawimawh ie tuk ram re ah.

Ringumna thutiema ngirin,
Thutak ban le inghatna ni la,
I sakhmel mawi a ta,
A hun taka chawimawi ning I tih.

I sakhmel hi Ţing angin lo dum sienkhawm,
Kei chun ‘hangnal’ hung ting ting ka ti che,
Ringumna thutiema I ngir zing leiin,
I ropuiin entawn tlak I nih.

Hringmihaiin sakhmel ah hnawl sien che khawm,
An hringna vawitam I sanhim a,
Khambak sir ah ringum taka lo umin,
Hringna hlutak I lo sanhim hlak.

Suilung lawma Chep Chephai zai vawrna chu,
Nang ngei hi I lo nih Thingkunghmui,
Nangma zar ah lungphang lo ten țuon kan rel,
Hringmi hraichawi zaleng ruolhai hin.

Nang khawm sakhmel ah suong ding nei naw la khawm,
Ringumna thutiem ah I ngir chun,
Sin ropui le insang chu phur thei I ta,
Malsawmna hlutak chang ngei I tih.

Ṭobul, Volume I – Issue No. 01, Changer (October) 2023. An e-Journal of Hmar Literature Society Delhi.