Hlêprûkna

Isaac Hmar, Editor

Achunga thupui tarlanga um hi, a’n țanna ei hei sui chun a lo sawt ta êm êm. Thlatu bul Adam a’nthawk ta dai kha a lo nih. Pathienin Ama angpuia a siem le nî tina leng hmun khat dinga a lo siem a ni a, sienkhawm, a suol le țha hrietna thingrâ kha Pathien thu tiem khawm hre chang loin an lo fakruk a nih. Akan khawm kha ei en chun, Pathien phallo rallak thil a lo hlêprûk, Anani le Saphira hai nûpa khawm a, an hnuoi man kha an lo fâkrûk a nih. Hieng ei hung ziek nawhai tam tak khawm hi Bible hunlai khawm hin hriet le hmu ding tam tak a um.

Hun hung inher liem peiin, ei tulai khawvêl nun ei hei thlîr lem hin chu, ngaiin ei nei el chu ani ta naw maw? Tî thei ding khawpin a hung hluor ta êm êm. A hlêpru hrât hrât hi a ding chang, a hlêpru thiem thiem hi mihai ngaisang le inza ei hlaw ta pei a hawi ta khawp el. Țhalai tam tak lekhathiem sin nei dinga mâni dithlang thei khawpa inziek tling ngat hai khawma ei lungrila ei tum tak ni a inlang ta chu ieng department a hin hlêprûk ding sum lêngvâk a tam a? Tî hi ei mit fûkna le ei beisei chu a hawi tak ta. Ei politics lem hi chu, hril seng loin ei hlêprûk chu a hawi tak ta. Nulepa tam tak khawma mâkpa dinga an dit chu “mi hâusa” hi ani tawp el ta a hawi.

Ieng leia hâusa am? Sum thienghlimlo am ie’m? tîhai hi ei sui tum bêk ta naw niin a’n lang. Ei in le lo ropui le mawi êm êma ei bâwl ei tihai hi hung țawng suok thei ta ngat hai sien ieng ie’m âw an hril ding? Țhenkhatin “kei chu mi rethei hai dawmkânga dinga sawrkâr mi tî ka ni a chu, ka pû’n hieng ku hin a mi hmang ta dai a ni hi!” Thenkhatin, “kei chu lam siemna ding” Țhenkhatin “kei chu repairing-na ding,” an ti ferfur el hi ring a um. Ei ram hi hmangaitu indiktak neilo, sum zawngna le sumdawngnaa ei hmang niin a’n lang. Indikna ringuma le Pathien țina a um ta nawm amani âw ei ti vawng vawng chang a tam ta êm êm.

Aru inlang rawta hretu Pa Pathien hin, vân chung insângtak a’nthawk khin chu hre ngei ngei vawng a tih. Aw leh, hlêprûkna hi Bible a hin hmun dang dangah hin hmu le hriet ding a tam ruol ruolin, hleprûkna a theidâna leia phubalâkna khawm tam tak a um. Mihriemin phubâ ei lak ei tihai ve hi chu nep tak a nih. Chun, mimal le pâwl ei tihai suksuolna lei khawm hin hnam pumpui chen khawm hin a lo tuor thei a nih. Akan thil suksuolna/ hlêprûkna leia Isarel hai tuorna dâm kha a rapthlak bêk bêk! Hril el seng ni naw nih.

Ei ram ei hnamin a mamaw êm êm chu, (1 Samuel 12: 1-5 ) na, Chun, Samuel chun Israel mi po pohai kuomah chun, “Ngai ta û, ka kuomah in thuhrilhai po poa chun in râwl ka ngai a, lal ding chu ka siempêk ta cheu . 2. Tuhin, ngai ta û, lal chun a lo keihruoi ta cheu a, kei chu ka hung tarin ka lu khawm a’n țuok ta a; chun, ngai ta u, ka nâupasalhai lai an um a, ka tleirâwla inthawkin tuchen hin ka keihruoi cheu a. 3. Hitaka hin a um a, Lalpa hmaa le a hrieknâl hmaa hin mi sêl ro le? Tu bâwngchal am ka lâkpêk hlak a? Tu sabengtung am ka lâkpêk hlak a? Tu am ka hlêm ta hlak a? Ka mit sukdel dingin tu kuomah inthawkin am thamna ka lâk hlak a? Thung nâwk vawng ka ti cheu,” a ti a. 4. Anni chun, “I mi hlem ngai naw a, i mi suknawmna ngai bawk naw a, tu tûta kuta inthawk khawma lâk âwm lo chu i lâk ngai bawk nawh,” an ti a. 5. Chun, ama an kuomah, “Ka kuta hin âwm naw ieng khawm inhmu naw tî vawisûn hin Lalpa chu nangni lâia hretu a nih; a hriek nâl khawm chu hretu a nih,” a ti a. Hi niin ka hriet.

Ei ram ei hnam khawma hieng ang mî hi a nih a mamaw. Hi le inzul deu tulai ruolthar lâia ngâi dân hungsuol ditlo êm êm le indikloa ka ngai lungril mi kâptu lientak Pakhat chu, Kohran hi ei hnam keidartu le mi sukdartu anga intum, Kohran mî deu hai le rawngbâwltuhai hi hnam țhuoitu ding le politics țhuoitu dinga ei dit naw hi a nih.

Pathienthu chau naw hi chu iengkim hi an danglam thei vawng. Ei ruolthar ngâi dân țhenkhat hi chu, eini thû hi Pathien inzâwmtir ei tum el ta khawm hi a hawi khawp el! Pathien hi ieng kawnga khawmin keiher teu teu nâw’m ei n’a. Ei thû le ei țha tî hi zâwm ngai bawk naw nih.

Ei hnam le ei ramin a mamaw tak chu, mi piengthar indik, Pathien țî mî thamna la ngailo hlêpru ngailo hi a nih. Hla phuoktu chun “Ram le hnam ngîrsuokna bulpui tak chu, Krista Chanchin Țha hril hi a nih” a ti chu. Chû leiin, Pathien No 1-na sie zat thei hai hi a nih ei hnam le ei ramin a mamaw chu. Hieng ang mî hi hotu le țhuoitua ei nei hun hun chu ei ngîrsuok hun ni’ng a tih. Hieng ang mi hin “Hmâ țhuoi ka tih, mi zui ro leh,” an ti hun hi a nih tlumte thlîra ei lo thlîr chu. Chu pha zet chun a nih “HLÊPRUKNA” hi hleprukin um ve thung tâ’ng a tih.

Ṭobul, Volume III – Issue No. 01, Thlaphal 2025 – Thlaphur 2026. An e-Journal of Hmar Literature Society Delhi.