Lungriltaka Infuina

An dik nawh ti i hriet a; i chel tlata i fê sawn nuom naw chun, indik naw chu nang kha i nih. A tha naw ti i hriet a; sie hmang le fê san i tum naw chun, a ṭha naw chu nang kha i nih. Mi dang hnê dingin nang inhnê hmasa phawt la; hrât deuin iengkim i hnê thei ti inhril la, mi hrât chu ni’ng i tih

I lungril infuitu dingin nang nêka ṭha an um nawh; nanga inthawkin iengkim a ṭha thei, i lungril inpawm dân kha i nîna a ni a,
Mi nêp tak, theina nei lo angah inngai naw la; sukhrât ding chein a siemtu che hi a vara, a hrât tâwk.

Midang hmû le hriet dân che ni lovin, nang inhriet dân kha i nun kei ṭhuoitu a ni si a!

I ngîrhmun, i chan, i tawng mêk kha pawm harsa ti'n chaupui el dingin inngai lul naw; Pal tlanga, ngîr suokpuia, a phéna malsâwmna inthup hai hmu suok dingin i thisen le thluok kha a ṭha tâwk a. I thei ngêi ding leia kha nun kha tawng i nih. Nanga siemtu che hin minit khat khawm an sîm san lul naw ding che, beidawng ding i ni naw aw!

Ieng ang khawmin i lungril nain lo sâwl sien khawm; chulei chun, khawvêl hin tuorpui chein tâwp dêr naw nih.

Hlâwsamin indawm kûn ngâwi ngâwi la khawm, khawvêl hi châwlin i natna hai khawm chu tuom dam tum chuong naw ni hai.

Zânah imu intuo lovin inrûm a, a tûk nâwkah khuo a hung var a; i bula mi ha'n i tuorna leiin ngaivenin an duot chuong hliek naw ding che.

Khawvêl hin ei tuorna hi a mi’n ṭawmpui naw a, ei beidawng ruok chu phal nawh; An vir kuol zing a, ei hringna a tâwp hmâ khat chu; chuong ang chu a ni zing ding, chuleiin, 'Nang' kha i pawimâw!

Intak sien khawm i bei ṭang ṭang a ngai! Inzak naw, beidawng bawk naw rawh; mî khawmin an pal tlang chu i pal tlang ve thei ding a nih.

Pârte mâwi tak tak hai hi hmun ṭawpa inthawka hung mawng suoka pâr an ni a; vadung ruom inthûk tak tak hai hi lo um naw sien, tlâng chunga khaw thlîr vêl hi inhawiin, an mâwina chenve khawm an phâk kher dim!

"Sumrisâng mâwina ei hmu ding chun rawsûr ei nghâk pei a ngai" ti ang khan Ni sat laia inzâm chu sâr inzâm a ni hlak kha mâw....!

A ṭha lem beisei la, i beiseina chun i hun tawng mêk kha pawmna a pêk ding che;
Ieng khawm i tuok pal thei, i tuor muolsuo ngêi ding ti ring la; i ring chun beisei tlat rawh, hun chu nghâk la, hunin hun ṭha hung intlun ngêi a ti che! Nang nêka hrât lem tû’m um bîk a, nang nêka fel le var lem chu tû'm? I tuor le tawng ang kha chang sien tuta i nîna kha a phâk kher dî'm? Nang chu i tlu rawp thei, i tho nâwk hlak si a; i tlûkna hmuna i thil hmû kha ngil taka lam hrâw hai chun an hmu vê si nawh; nun hrang hrang i pal khan thil tam tak i hriet pha a ni kha!

Thlâ khi a khât chauin a var/ êng el a, lâwmtu, thlîrtu nei naw chu a ni bîk naw hi! Arasi a hlie rawp a, Arasi khawmin a var/ a êng a ṭhul pha chuong hliek naw mâw! An hmunah an theina tâwp insuoin a siemtu dit angin an var a, an mâwi êm êm el a ni si hi!

Nang le kei an chen naw rawp ding ei theina; ei piengphung le mîzie khawm a dang nuoi hih! Inpâkna ei dawng hai, ei ṭhatna, mâwina an dang a; ei êng a fie dân an ang thei naw hlak. Nisienlakhawm, lungril sukhnuol ding a ni naw ie; ei umna hmun sengah ei theina a ṭha tak insuo tum tlat ei tih.

I lo hliem ta a, i lo chauin, i lo tlu sawp ni mei a tih; i hun fe ta hai chu i tuom dam thei ta nâw tawp khawm lo ni sien; hmâ tieng beiseina thar nei la, nun siem ṭhatna dingin "an hnu tah" ti um lova!

Bul ṭan ṭhat nâwk thei nâw sien khawm, tâwpna ṭha lem intlun ding chun theina i nei; i tum tlat chun lam a um ding.

Ngîrhmun ngaia ngîr zing nêk chun, damte tea pên suok khawm thil danglam a ni si!

I umna hmuna khan i hlu naw a ni thei; ngîrsuok la, pên suok ta; ngai hlua thlîrtu che tam tak an um a.

I nîna le, i zie indik tak le hung tho la; i theina, mi hrât i nîna hung târ lang raw le!

Thilsiem po povin an thei tâwkin a siemtu ropuina di'n pâr an insuo a, an thei ang tâwka ṭha an inlangtir lai hin; hringna hlu tak nei nang hin theina nei lovin lo inngai pal i ti aw!

Nun hi mâni insit zing puma hmang liem ding chun inpàm a um taluo; lo chauin, lo inring zo ta naw la khawm, tho suok tawp raw le!

Lâwmtu leh ṭhangpui ding che nei naw i ni naw hi; i tho suok hun lo thlîr zingtu nangma siemtu che a um si a!

Inpâktu le infuitu i beisei le dit ang thlap i hmu fûk naw a ni pal khawmin; i khât khawmin i tha tawk a. Nang infui ding che chun nang nêka ṭha an um nawh. I um hin khawvêl a mâwi a, khawvêl cheitu ni dingin i êng kha a fie tâwk.

Ieng dang i mamâw naw ie; i lungrilin thlîr indik sien, (a lungrila Zion panna lam lien um hai chu) i êng pan indik a ta; i êng chu hung fie peiin midang ta ding khawmin lampui, malsâwmtu, mi hlû le ropui ni ngêi i tih..

Ṭobul, Volume II – Issue No. 01, Tuolbuol – Thlaṭau 2024. An e-Journal of Hmar Literature Society Delhi.