Hmangaitu Che Ka Nih

I ditthlangna kan za a
I duthusam chu ka dit pui che
I theina ka thlir hlak a
I ta dingin hla ngai naw ning.

I kuta keiin ka chel zing naw che a
I ke pen tinah kan rawl ngai nawh
I remruotna dalin lampui ka dang nawh
I ta dingin hla ngai naw ning.

I natna tuom damin
I phurrik hai phur pui thei lo che in
I buoina chingfel thei naw lang khawm
I ta dingin hla ngai naw ning.

Hlimna hmunah thuoi che in
Hadamna ka pek thei naw che a
Hmu zing che a ka en naw lai che khawmin
Hmun hla ah fe san ngai nawng ka che.

Beisei ding um ta lo le
Beidawng ni i nei changa
Bel ding le panin i hriet naw pha
Bei fan fanin infuitu che ning ka tih.

I lungril thawpikna
I thu pai bun ruokna ding
I hril nuom tamtak hai hrilna din
I ta dingin hla ngai nawng ka tih.

Kei chu nang hmangaitu che
I ta dinga indin
I nun enkai dinga khuo ruot
Hmangaitu che ka ni si a!

Ṭobul, Volume II – Issue No. 03, Thlahmur – Mimtukthla 2024. An e-Journal of Hmar Literature Society Delhi.