Sikpui Hla

Tv. Elshadai Sanate

Hmar nau zaleng salung lâwmna,
Sikpui inthang kan nuom kan tuolchaina ah;
Pipu lamtlak sîrin a vâl nghaknuhai,
Insuikhâwmin pheikhai kan ruol sieu sieu.
Ruolhlui rau biek hniengzu nun nuomna an tih,
Keini ruolthar thu le hla lairam ang thona lo nih;
Hraileng kan mâwi tûrni êng rieu hnuoi ah.

A ṭhieng ṭhiengin chawnbân vawrin,
Vânzâi kan rem chungvân hnuoiah.
Aw Pathien i malsâwmna hlu leh,
Hring chem ang min dam la;
Tlu a ruolin pheikhai min ruol ve rawh.

Sakhming Hmarhai hung tho un la,
Ei hnam rothilhai chawisangin hlun ei tiu.
Hmarâm, ngoteker, thangsuopuon, tawmlairang;
Ṭhiengten lanu vâlhai kan lam sieu sieu.
Vângkhuo rûnlumtu hringtin kan mâwi sieu sieu,
Anchawng angurhraichawi fahra thlirbik umlo tein;
Li ang damin nunkhat kan leng diel diel.

Pipu hasawl dawi ang dam tu,
Nau ang kan lâwmna sikpui bungbu zing rawh.
Tlangkhuo a mâwi lunglâi i hluo aw sikpui!
Thlatu hnîekhnung ṭha mi hnutse pêk la,
Zing kawlni suok anga nundân mâwi kan insuo ve na'n,
Kan Hmar ram kan Hmar hnam mi hung dawmsang la;
Hmar tlangpui lâwi ang anthang ve na di'n.

Ziektu chanchin

Elshaddai H.Sanate hi fam tah Pu Lalchawlthang le Pi Lalkhawmkhawl hai naupa a nia, November 17, 2002 khan Muollien, Assam a pieng a nih. Kum 2018-in PMS Junior Higher Secondary Hmarkhawlien a inthawkin matric a pass a, kum 2020-in Nehru Higher Secondary Pailapool, Assam a inthawkin pâwlsâwmpahni a zo nâwk. Insung harsatna leiin kumkhat châwlin, Haflong Government College ah degree inchûkna a sunsawm nâwk a nih. Kum 2024 Haflong Govt. College in competition Items chi dang dang a huoihawt ṭumin Poem (hla sam) ziek inelnaah 1st prize hmuin April 22,2024 College Fest 2024 hunah Certificate le Trophy inhlân a nih. Hmar Student' Association, Joint Higher Secondary and Colleges Unit, Haflong 2023-2024 Information Secretary sin a lo chel ta bawk.

Ṭobul, Volume II – Issue No. 02, Thlatun – Thlado 2024. An e-Journal of Hmar Literature Society Delhi.