Hanabi (Thai Kona Hla)

Tv. Hosea Khawbung

Vânler boruok inhawng dei duoia
raw tlêp ter tuor hlak, Japanese ṭawngin
hanabi an ti, ko dân tuolṭo kamsuok
ei nei ve naw leh hin inzawmna pakhat
in nei ta:
Fûmipui kumkhat lam hraw,
a hmadawm suoa a hang inher liem ding hin,
ka ngai zuol nawk hlak che, ruok huoiin.
Favâng hung ning a ta, khaw inthim ṭhat
hmân thla thar tûksuok khawm, thar hlawkin,
naute innui thei hlim angin hung innui nawk a ta,
zântieng boruok thawveng leh,
khawvel hi makhat chun kan thawl zuol awm.
Ngai raw, Ṭhamâmpui,
indi ar ruol angin khum pindan khat sunga
inrem rawngin khawvel hih mi hluo bit pui
ni el ta la chuh-
Dâr insik riela inṭhugin,
ei zântieng favâng vânzawla khawm
hanabi de chei chuoiin raw puok a ni ve
ngei awm si a.

Ziektu chanchin

Tv. Hosea Khawbung hi Parbung mî a ni a. Tu hin English Department, Manipur University-ah Ph.D a’n chûk mêk a nih.

Ṭobul, Volume III – Issue No. 01, Thlaphal 2025 – Thlaphur 2026. An e-Journal of Hmar Literature Society Delhi.