Ṭhalâi le Sûngkuo

Isaac Hmar, Editor

Sûngkuo hi khawvêla dinga pawimaw êm êm lâia pakhat a ni a. Mihâusa, lekhathiem le mihlâwtling ei tî hai hrim hrim hi an inṭanna chu sûngkuo hi a ni zat zat.

Misuol mi khêlhlip le thabo ei tî hai inṭanna khawm sûngkuo hi a ni tho hlak. Sûngkuo ṭhâ chu lungpui chunga inbâwl, sûngkuo ṭhalo chu phâiphin chunga inbâwl le têkhi an n’a, an nghatna foundation hi sûngkuo a ni hlak lei a nih. Nang le kei ei sûngkuo ei foundation hi ie’m a ni a? Mihâusa suontam dei loa boral le mi rethei suontam hnung khawma an thlâhâi bu dâwl hrim hriet ni lo a hung parsuok tam tak ei um, hi hin an entir tak chu ei sûngkuo innghatna ei foundation kha a nih.

Mi pakhat hin in lien deu el sâwng thuma insâng hi a bâwl a, a hawngtû dingin Pastor a fiel a, ruolṭha sûngkhat laina lê kohran a lâwmpui dingin a fiel bawk a, Pastor chun in neitu chu Pathien hmingin ka’n dawn che i thâw suok lieu lieuâ i bâwl tak room hi khawm a n’a? Tiin a’n dawn a, in neitu chun thlâi suongna room chu a kâwk hmu ta a, chû room chau chu Pastor chun a hawng el ta a.

Khawvêla hin a hlêprûk thiem thiem ku hi sum hau, sum hau hau ku mi thilthâwtheiin ei en vawng amanta tî dingin a um.

Sum inthienglo indiklo taka sum hau thêrthûr hai ku hi hlim dingin ei beisei hlak, anâchu an sûngkuo nun tak tak ruok chu inhnar ding a lo um dêr nawh, tangka ku hi hlimna a lo ni nawh.

High school pakhata an Head Master kum sawnghni lâi lo țhang ta hi an bân thut el a, mifel le miṭha tak a ni leiin a khuo hâ’n an inpâm êm êm, sawrkâr khawmin an pâm leiin inhril fie dingin an ko ta a, a ma chun “ka hlâw hi a ṭha hnem taa ka nâuhâ’n Isu nekin ka hlaw an beiseina an innghat ta leiin hi sin hi ka chel thei ta nawh,” a hei ti ṭhuoi el a. Chêng sângkuo chau hlâwin kohranah sin a hei thâw a chu pa hlâwtling tak ani ta tho a nih; a nâuhai po officer an ni vawng.

Amâ’n a nâuhai an chuktirna chu sum inthienglo chêng khat khawm insûngah in hung lûtpui ding ani nawh tî hi a nih. Ei umna khawvêl hin hmâ a sâwn hle a, sûngkuo tin hin chû hmasâwnna chu ei hnawt vê bawk a, ei sûngkuo innghatna tak hi ie’m aw a ni ding? Sum thienghlimlo hlêprûk le mî kuta mî benthlâkpêk el dâm, thamna le thil tirdakum eini tawkah thli hung hrangin tui hung lien ta thut el sien, ei thluse rup el di’m maw? Ka ṭhalai chanpui tiemtu ditumtak hai nang le kei ei sûngkuo innghatna foundation tak hi ie’m a n’a? Suikir ei t’a, a siemțhat mâw hi ei koah a’n nghat a’n sawn nâw! Sakhuona le khawvêl thil a khawm ni sien, a sie lê a ṭhâ inṭanna chu sûngkuoa innghat a n’a, ei insûng seng hi ei mâwphurna a nih.

Ṭobul, Volume II – Issue No. 05, Thlahmur – Changer 2025. An e-Journal of Hmar Literature Society Delhi.