Ṭawng Humhal

Isaac Hmar, Joint Editor

Siemtu Pathien in hnam tam tak a lo siem ang bawkin chuong hnam hâi chu țawng a mi siempêk a. Țawng hi mi keikhawm/ mi zawmtu le sukdartu hmangruohai lâiah a haihawpui chang phâk a ni tlat. Chûleiin, khuonu mi pek ei piengpui ei nû țawng hi ngai hlut le humhal ding ei ni a, amiruokchu, humhal nêkin ei ngaitha a, humhal ei inhlâwtir nawh.

Hieng internet WhatsApp le Social Media dang danga ei thu post le ei message ziek dân hâi enin, mâni țawng ziek ei ngaitha ziet chu a’n lang thei. Ei țawng hi a nina thlapah ei hmangin ei ziek phât phât hin a mâwiin a nal a, a khûm zotu ding khawm hnam dang an um nawh.

Chûleiin, ei ram le hnam tâ dingin ei țawng ngêi hi hrâtna ni sien lâ, inzâpui loin suong tlat ei tîu. Ei hnam sûnga Lekha thiem ei tîhâi le mi ropui tak tak hai, ei țawng hmang thiem lo le ziek thiem lo tam tak ei um. Hmar țawng hi a’n tak a, hmang thiem le ziek thiem harsa ei tih.

A ngaisaktu khawm ei tlâwm a, an chûk nuom khawm ei vang a. A nih, ei țawng hi inchûk chi pakhat chu a ni vê ngei el. Mani țawng khawm ei hmang thiemin ei ziek thiem naw chun tûin am hmang thiemin mi ziek thiempêk a ti a. Sap țawng le hin Hmar țawng hi an âihal vieu am a ni ding chu sap țawng ei hriet inhril deu deu a, a ziek khawm ei thiem deu deu.

Chuonglâi zingin ei Hmar țawng hrietna a pâwnlâin a da deu deu vê thung. Ei țawng ei thiem thei naw le ei hnung tawlna san bulpui taka ka ngai chu mâni țawng ei ngai nêp lei hi a ni tak. Sap țawng thiem naw chu thil inzakuma ngai si, mâni țawng thiem naw ruok chu inzak tak nêkin insukchangkangnaa ei nei ta lem. Sâp țawng hi ngaisang ding chu a nih, amiruokchu mâni țawng ngai nêp khawpa ngaisâng ding ruok chu a ni nawh.

Mâni țawng thiem naw hi inzak nachâng ei hriet hma chu thiem thei ngai nâwm ei tih. Hnam danghai angin mani țawnga inziek lekha tiem ding hau naw inlâ khawm ei nei sun a Bible bêk hi ngai hlut nachâng hrein kum khatah vawi khat bêk dâm hei tiem suok inlâ, chu chun țawng tiengah iemani chena chu a mi dawm kâng ding a nih.

Chûleiin țawng tienga phingțâm le dangchârhâi tâ dingin khawp kham tling naw sien khawm, țâm hnêmna khawp chu a tling a nih. Hnam țawng chu ngaisak ding le humhal ding ei ni a, a bohmang ding le a siet ding phal loin a enkawltu nî ei tum seng ding a nih.

Ṭobul, Volume II – Issue No. 04, Tuolbuol – Thlado 2025. An e-Journal of Hmar Literature Society Delhi.