Kum Sawmhni Hnungah

(O. Henry in a ziek inletna)

Pulîs pa chu fel vit vitin khawlaidung hrûtin an vir a. A felna hi ngaia a nei ta lei khawm chu ani a; “a fel zie inpholang tum a nih” hang ti dingin a fel zie thlîrtu ding meu an um si nawh. Zan dâr sawm chu a zuk inri vêl char a, amiruokchu rawsûr rim innam ham thli dei hieu a hrang lei chun, lampuia mihriem ding awm hrim hai chu a hnawt zam vawng a.

Changchavei mak le thiem taka a hmawltum a her vir vêl malamin, a fe peinaa chun dawr kawkkhar hai an khâr ṭha am tiin a hang hawng tum sin pei a. An khât tawka a tung a suk inher peiin lampui re dei dap chu a mit khau tak a hang inlên pei a. Hi mipa, pulîs hotu, mâni inringzo thei tawka taksa sek hi, muongna venghimtu thlalak mawi tak chu a put.

Hi lai buk hi inhma tak taka inkharkhip hlak anni a. An khât tawkin dumziel dawr annawleh zan khawvara bu suongsa zawr hai anthawka mei var chu hmu theiin a um ṭâwk hlak a; Chu ti naw chu, a tamlem hi sumdawngna hmun ani tawl leiin, inhma tak takin an inkhar hlak.

Kawi khata a zuk lâwn laklaw lai tak chun, pulîspa hin a lâwn a zuk suk awi a. Thîr ruomrawk zawrna dawr kawt inthim deu hieu hmun laia innghai pasal pakhat, a hmûra dumziel la sit ai chi lo chu a hmu a. Pulîspa’n a zuk hnai chun, pasalpa chu inhmaw de’n a hung ṭawng nghal a.

“Iengkim a ṭha e, hotupa,” hadam deu chun a zuk t’a. “Ka ruolpa ka zuk nghak mei mei ani ie. Kum sawmhni liem ta laia thuthiem kan lo nei lei a nih. I ta ding chun nuizat zuk um met a tih, ti raw? Thudik ani ti i chieng nuom chun la zuk hrilfie pêk ka che. Kum iem ani zat liem ta khan, hieng lai hmun taka hin fâk-le-dawn zawrna a lo um hlak a- Big Joe Brady’s Restaurant ti hming put.”

“Kum nga liem ta chen a khan,” Pulîs pa chun a zuk t’a. “Chun an ṭhiek dai a.”

Kawtkhar zûla innghaipa chun nawtchawk nawtin a dumziel chu a lâkkai a. Meivar chun vun da deu met le khâk inbêm deu hmaitlang a zuk suklang a, a mit hawdâk deu vawr le changtieng mithmul hnuoia a vâra sukpawpna bê inrîn deu zat chu a suklang bawk a. A rawmawl awr mandetna thîrkilte chu lunghlu mantamin an bel ti hmu theiin a um bawk a.

“Kum sawmhni liem taa vawizan ang hin,” pasalpa chun a ti a. “Big Joe Brady’s a hin ka ruol ṭha tak le khawvela ruol fel tak, Jimmy le bu kan fâk a. Ama le kei hi, hi lai New York hmunah hin, unau ang chara, lo seilien kawp kan ni a. Kei kha kum sawmpariet niin ama kum sawmhni. A zinga chun, kei, sim tieng panin fak zawng dingin kan thawk suok ta a. Jimmy kha chu New York anthawka kei dawk dân hrim kha a um nawh; hi khawvela hmun umsun ni awm tak khan a ngai el a nih. Hieng hi a nih, kha zan khan, hi hmunah, kum sawmhni hnunga, a hun le ni in ang chara, inhmu khawm nawk dingin kan rawt a. Kan umna a hla am a hnai am, ieng anga buoi khawm ni inla, hi hmunah kan inhmu a ngai tiin kan rêl a. Kan thlîr lawk dâna chun, kum sawmhni hnunga chun kei ni ve ve a iengthil am khuonu’n hma a mi ruot pêk a, ieng ang fâk zawngna le hlawtlingna kan nei a, ti kan hriet suok nuom lei a nih.”

“Hriet nuom a umin ngaithlak an hawi khawpel,” pulîs pa chun a t’a. “In inhmu naw kar lak sûng chu a sawt ka ti bâk el. Inzin dawk hnung chun i ruolpa anthawkin chanchin iengkhawm i hriet zawm ta naw maw?”

“Aw, a tîr chun kan inhrietpaw met,” pakhat pa chun a t’a. “Anachu kum khat kum hni hnunga inbiekpawna kan inhmang taa, kan lo intheinghil deu chu a ni ta hmel. I hriet am, sim tieng hi a lien ve a, sum hnar ding hi ieng kawng zawng zawng hi’m ani kan mei nasa ve a. Amiruokchu, Jimmy hi a la dam ani phawt chun, mi hung hmu em em a tih. Ka ruol hlui hriet lai po po a chu an dik tak bâka a ringum tak a nih. Theinghil dêr naw nih. Hi lai dawr tuol hung sir ding hin mêl sang chuong ka hung hraw a, ka ruolhluipa a hung phawt chun ka sawlman hi a phu ti hleng ka tih.”

Mi nghakpa chun sana mawi tak el a phawr dawk a, a sana sîn chu lunghlu chi te rek rek an bel a.

“Dar sawm inrina dingin minit thum,” a zuk puong a. “Kha bufakna dawr anthawka kan inṭhe hun kha zan dar sawm chat a nih.”

“Sim tieng chun i va che ṭha vieu tho naw?” pulîs pa chun an dawn a.

“Ti naw ta! Jimmy hin ka thaw fuk ziet hi a chenve bêk hmu ve sien ka beisei. Ama kha a awi chawi deu a chu mi ṭha ani a. Sum ka hmuna dingin mi var tak tak kan el pui kha a ngai a. New York a hin chu miin fâk a lo hmu ve el. Sim tieng chu chu chemte hriem anga intât ngei a ngai.”

Pulîspa chun a hmawl chu a hervir a, kalpen vawikhat vawihni chu a zuk lâk a.

“Ka hmazawna zuk fe pei ka tih. I ruolpa chu ṭha takin a hung ka beisei. A hun chata a hung naw chun i maksan el ding ani?

“Chuong chun chu la ti naw phawt ka tih!” pakhat chun a t’a.

“Darkar chenve dang bêk chu zuk pe sap ka tih. Jimmy hi a la dam chun, chu hun sûnga chu hung hman em em a tih. Ni raw se aw anleh, hotupa.”

“Mangṭha leh, pu,” pulîspa chun a t’a. A hmazawna chun a fe pei a, dawr kawtkhar hai chu a hang ensin nawn pei a.

Tuhin chu ruotehmer dei deu le inhmi deu zatin a sûr chak chak ta a. Nakie ta chiengkuong rak loa thli a hrang zeu zeu kha tu zet hin chu a mût fak fak ta a. Zansawta inlawn tlawm te la um hai chu re bawr le inhmaw deu zawt zawt in an invir taa. An zakuolum fuol mansa haia an kut an pur deu sap tawl ta bawk a. Thîr ruomrawk zawrna dawr tuola chun, a naupang laia a ruolpa hmu dingin mêl sang chuong hung inzin chu, chiengkung rak tanaw sien khawm, a thiltum suk hlawtling tumin, dumziel hawpin, a la nghak zing a. Minit sawmhni vêl a zuk nghak chun, pa dung insang pakhat zakuolum fuol ha, a zakuo rîngin a nakawr sun zak hi, lampui mawng anthawk chun a hung a. Mi nghakpa bula chun a va fe chawt ta a.

“Bob, nang i ni?” makti deu chun an dawn a.

“Jimmy Wells, nang i ni?” tiin kawtkhar bula ngir pa chu a ṭap a.

“Ka lunglai chu malsawmin um raw se!” ti’n a tlung thar pa chu a khêk a, an kut hai ve ve chu an zuk inchel pêk a. “Khuonu remruot ang ngeiin, Bob i ni chieng hle. I la dam phawt chun, hi lai hmuna hin ka hmu ngei ding che ti kha ka chieng a. Awle, awle, awle – kum sawmhni hi chu sawt tak a nih. Ei bufâkna dawr kha a lo bo taa, Bob; La um sienla ka ti khawpel, zanbu ei hang awt khawm nawk el ding ana. Iengtinam simtieng chun a nawt che leh, ruolhlui?

“Heiha; Ka thil ngen ta phawt chu a mi pek. Inthlâk danglam nasa khawpel, Jimmy. Inchi khat hnia i dung a lo insâng bîk ding hi ka ring naw hrim hrim.”

“Kum sawmhni ka tling hnung khan ka dung an ṭhang sap met a.”

“New York-a i thaw ṭha, Jimmy?”

“A zie a um. Khawpui sûnga department pakhata thawkna ka nei ve a. Hung raw, Bob; Hang invir kuol ei tih. Ka hmun hrietnaa ṭhuoi ka che a, chun, tienlai nun hril ei tih.”

Pa pahni hai chu lampui dunga chun kut inbâtin an lawn a. Simtieng mi pa chun, uong deu met chun a hlawtling zie hai hrilin, a sinthawna chanchin an zawt a. Pakhat lem, zakuolum fuol ha chun titak deuin a ngai a.

Kilkhata hin damdawi inzawrna dawr hi a um a, a sîr chara chun kawlphe ban var pap el a um bawk. Hi lai hmun an tlung char chun, an hmai hai chieng deuin an inen ta a.

Simtieng mi pa chu a tawp ta chut a, a kut chu a phawi dawk a. “Nang hi Jimmy Wells i ni nawh,” tiin a chât chut a. “Kum sawmhni hi hun sawt tak el a nih. Amiruokchu, hnar ngul sei anthawka hnar ngul tawia thlâk khawp dingin a sawt nawh.”

“A châng chu mi ṭha khawm mi suolin a thlâk hlak,” tiin dungsang pa chun a dawn a. “Minit sawm sung hi pulîs hrentangna hnuoia um i ni tah, ‘Silky’ Bob. Chicago ha’n kan umna tieng i hung tla ti an hung hril a, inbiekpui met che an nuom thu an mi hung hril bawk. To ṭawkin i lo kîr tum nawk ani? A awm tho ie. Pulîs thânaa ei fe hmain, hi hi lekhaziek chite hi hung pe raw an ti a. Hi lai tukver bula hin tiem rawh. Patrolman Wells anthawkin a nih.

Simtieng anthawka hung pa chun lekhaziek chite chu a hawng a, a zuk tiem tîr chun, det matin a kutin a chel a. A zuk tiem zo chi chun, a kut chu an thin deu met. A ziek chu a tawi ang reng.

Bob. Ei tina hmuna khan a hun taka ka um annawm. I dumziel la kai dinga mei i hang nawt var khan, Chicago a misuol man dinga an dittak pa hmel ka hmu a. Kei chun ka thaw thei nawh nia ka hriet leiin, a man tu ding chein, mi vantlang thuomhnaw hâk ka hung tir ta lem dai ani kha.

— Jimmy

Ṭobul, Volume II – Issue No. 04, Tuolbuol – Thlado 2025. An e-Journal of Hmar Literature Society Delhi.