Hmar Thu le Hla Thuthar

1. Tarik 11 Thlaṭau (March), 2025, zântieng dâr 3:00 khan For One Life Asia Studio Hall, Rengkai, Tuiṭhaphai-ah Hmar lekhabu ‘Thawnthu tâwi thlangkhawm (Collection of short stories in Hmar)” tlangzar a nih. Hi lekhabu a hin thawnthu tâwi 15, mi hrang hrangin an ziek inchuon a ni a, Pu V L Renga Hriler-in a published a nih. Tlângzarna hun hi Pu L Ruoivel Pangamte, Assoc. Prof. (Retd), Chairman, Hmar Literature Society, Manipur-in a nei a, Pu Lalṭhalur Infimate, Officiating Headmaster, Rengkai Govt. High School-in lekhabu thlȋrzauna hun a hmang. Hi hun hi sakhuo tienga ṭhuoitu, hnam ṭhuoitu, inchȗklai ṭhuoitu le hlasakthiemhai bakah mipui ṭhahnemtakin an uop. Lekhabu hi copy-a Rs 150/- a na, copy 500 siem a nia, a dithai chun 9650740336 kuomah order thei zing a nih.

2. Hmar Art & Culture Society (HACS), Tuiṭhaphai, Manipur-in an buotsai, Prof (Retd) Lal Dena-in a ziek “The Hmar Culture Relics Historical Monuments in Pherzawl District” ti chu tarik 17 Thlaphur, 2025 sun dar 11 khan RWUS Building, Sielmat ah Rev Ros Infimate, President, Hmar Inpuiin a tlângzar. Lekhbu thlȋrlawkna hi Pu Timothy Z Zote, Secretary, HACS in a nei a, mipui ṭhahnem tawk takin an uop. Hi lekhabu hi copy khata Rs 150/- a nih.

3. Hmar Literature Society Delhi (HLSD) chun Mizo Academy of Letters (MAL), Aizawl, Mizoram a inthawk MAL zawm dinga fielna lekha a dawng. Hi fielna hi MAL dân hnuoia pawl pakhat anga in register ding a fielna thu a ni a, an dânbu an hung kil sa bawk. HLSD chun hi fielna hi lawm um a ti a, HLSD thil tum Hmar ṭawng humhal, sukvul, chawisâng le sukhmasâwnna kawngah a hlawkpui dingam tiin suichiengna a nei mȇk a nih.

Ṭobul, Volume II – Issue No. 04, Tuolbuol – Thlado 2025. An e-Journal of Hmar Literature Society Delhi.