Hmar Book of the Year – 2023

Hmar khawvȇla a hmasatakna dingin tarik 11 Thlaṭau (March), 2025, zântieng dâr 3:00 khan For One Life Asia Studio Hall, Rengkai, Tuiṭhaphai-ah Hmar Literature Society Delhi (HLSD)- in a buotsai ‘Hmar Book of the Year – 2023’ result puongna nei a nih. Hi huna hin Prof (Retd) Lal Dena chu khuolliena ṭhangin book of the year puongna le lawmman inhlânna a nei.

Pu L. Thanmawia Pajamte lekhabu ziek, “Mithi Thlarau Zinkawng” (A Mythological Concept Journey of the Souls) chu HLSD-Hmar Book of the Year - 2023 a puong a ni a, lawmman-in ngaihlutna thuziek, Hmarpuon muffler le sumfai ₹20,000/- inhlân a nih.

Hmar Book of the Year- 2023 lawmman bâk a hin consolation prize lekhabu ṭha panga thlangsuoka umhai kuomah ngâihlutna thuziek le sumfai ₹1,000/- seng inhlân a ni bawk. Chuong lekhabu pangahai chu (1) Lalpa Mi Pawlna - Ziektu Pi Jami Darngawn (2) Ṭawngṭaina Thilthawthei Part I to IV -Ziektu Pi Lal Remsiem (3) Missionary Khawvel -Ziektu Rev. V. Ramchuoilo Varte (4) Hmar Lengkhawm Hla Suizauna -Ziektu Pu HC Hrangate le (5) Lalpa Miṭhuoina Lamtluong Part I to IV -Ziektu Pi Lal Remsiem hai an nih. Consolation prize hi a dawngtu le an aia lo dawngtu hai kuomah Rev. Hrangtinai, Dr Grace Latlinzo, Pu L. Ruoivel Pangamte, Dr. Lalṭanlien Khawbung le Dr. L. Fimate haiin inhlanna an nei a nih.

Hmar Literature Society Delhi Chairman Pu V L Renga Hriler-in Hmar Book of the Year buotsai a nina san le tu ta result puonga um mȇk buotsai ani dânhai a hril a. HLSD thiltum (motto) “Hmar ṭawng humhal, sukvul, châwisâng le sukhmasâwn” a ni ang hrimin, ziekmihai ta dinga dawkan buotsai hi ṭawng humhal, sukvul, chawisang le sukhmasawnna lampui nia ngâiin Hmar Book of the Year hi beiseina insangtak leh an ṭawn tawp el a ni thu a hril. A vawikhatna hi a famkim zo nawna a lo um a ni khawma, hmatieng peia kalchawina sirbi pakhat a ni ding thu a hril sa bawk. Pathienin rem a ti chun Hmar Book of the Year 2024-25 buotsai nawk ngȇi an tum thu khawm a hril sa bawk.

Book of the Year – 2023 a hin lekhabu (a series zawnga tiem lovin) bu 22 pȇk lȗt a nia, endiktu hi mi pathum, Delhi, Muolhoi le Imphal / Assam a literature tienga ṭhuoituhai ruot an nih. Endik dan thua, endiktuha’n mark an pȇk chau hi belkhawm lovin Book of the Year Result Board-haiin weightage an pȇk nawk vawng a, total marks le weightage an hmu chu keikawpa result hi siem a nih. HLSD chun Hmar ziekmi, mi ril tak takha’n an lekhabu ziekhai Hmar Book of the Year – 2023 a ṭhang dinga an hung pȇk hi petuhai chunga lawmthu a hril tak meu a nih.

HMAR BOOK OF THE YEAR – 2023 DAWNGTU PU L. THANMAWIA PAJAMTE

CHANCHIN TAWI

Tuolbuol (Jan) 5, 1941 in Buṭhangkhal khuo, Jiribam-ah a pieng a, a Pa chu Rochhinga (Rova), Independent Kohran Pastor a nih a, a nu chu Ṭhakim, Ṭhiek Khawzawl a nih.

Kum 4 mi chau a niin a pa’n a thisan a. Lung dello, thing dello tachâwk chu a nu enkawlnahnuoia a hung seilien ve a. Lekha inchûk nuom ȇm ȇm a nia, sienkhawm, insung harsatna leiin anchȗk vat thei nawh a. Kum 19, tlangvâl a ni hnungin pawl 5, Phulpuia a’n chûk a nih. Cheng khat le duli chawiin lekha inchûk dingin a pên suoka, pawl 5 chu 1st Division ah a pasi a nih.

Kum 1964-in Sielmat-ah a kaia, kum khat sûngin pawl 9 le pawl 10 a thaw a, vangnei thlâktakin Matric 2nd Division ah a pasi a, anachu, an pasiet leiin College a zawm thei ta naw a nih.

Kum 1965 in B. Huonvenga IBPM ME School a Head Master sin a thaw a. Kum 1969-72 in Calcutta Bible College-ah Bible an chûk a, a pakhatna a lâk nghe nghe. Hi lei hin chawimawina le lawmman a dawng a nih. Kum 1972-1992 chen EFCI Kohran a Pastoral Ministry sin a thaw. Kum 1973-in Massouri, Uttarkhand (khang hun lai khan U.P) ah Leadership a training a. 1975 in Nasik, Maharastra-ah CEFI a’n chûk nawk a. Room fai tak lawmman a dawng hiel a nih. Kum 1986 in Amsterdam, Hollandah International Itenery Evangelist Dr. Billy Graham hnuoia a training bawk.

Tuolbuol (Jan) 8,1965 in Kohran dânin nuhmei a nei a, nau nuhmei 3 a nei a nih. Chu hnung sâwt rak lova a nuhmeiin a thisan a nih.

Kum 1993 in Pu T. Sangkhum a rawiin Cachar Hill People’s Federation(CHPF) an indin a. Tuta Barak Valley Hill Tribes Development Council hi an nawr dawk a, office-ah UDC sin thawin, tu hin chu a bâng tah. Chun, PMS Higher Secondary School, Hmarkhawlien-ah kum 8 Hmar MIL an chûktir bawk. Buṭhangkhal ram le khuo-ah anni sûng hi lal an ni a. A pahai le a û, lalhai an thi vawng ta leiin lal nina DC-in a pêk a, vawisûn chen hin lal nina chu a la chel zinga, Jiribam Chief Association a Chairman chel lai a ni bawk.

Pu Thanmawia Pajamte hi lekha tiem le ziek inhnik mi a ni a, a tlin tâwk tâwkin a tiemin a ziek hlak. Lekhabu 8 le article puitling 200 chuong a ziek tah. Middle East le Israel ram chanchin hi Khawnvar Magazine-ah a la ziek zeu zeu zing. Sienkhawm, a mit a ṭha ta naw leiin lekha tiem le ziek hi a thawthei ta naw a nih.

Tuhin Hmarkhawlien-ah Hmar Upa Pawl an dinpui a, Chairman mawphurna a chel mek a nih. Hi pawl hin Hmar Musuem bawl dingin hma an lâk zing a nih.

Pu L Thanmawia Pajamte hi tu hin a sunghai leh Phaizawl Lily Veng, Hmarkhawlien ah an chȇng mȇk a nih. Ṭobul Journal chun Hmar Book of the Year – 2023 a dawng hi a lawmpui takzet a, ngalfima dam ding le; a theina, a thiemna le hrâtnahai ram le hnam ta dinga la hmang sunzawm pei dingin ditsakna insângtak an hlân a nih.

HMAR BOOK OF THE YEAR - 2023

A lekhabu hming : Mithi Thlarau Zinkawng (A Mythological Concept of Journey of the Souls) Ziektu : Pu L Thanmawia Pajamte, Published by Partnership Publishing House, Shillong, Churachandpur, Aizawl, 2020.

Hi lȇkhabu hin ei pi-le-puhai sakhuo, ser-le-sâng, inthâwina, mithi thlarauin mithi khuo a pan danhai a târlanga, Hmar nauhai hi Greek, Rome le Middle East ramhai ang el a THAWNTHU (mythology) a hausa tak ei ni zie a tarlang bawk a nih.

Ei pi-le-puhai huna khan khawtlang (social) inenkawl dân, fâk le dâwn (economy) zawng dân le sakhuona (religion) invawng dân ziek ni lo, thu le hlaa inpeksâwng; mitinin an zui a um a. Thihnunga thlarau châwl hadamna chang tum hrim hrimin an damlai nihai an hmang hlak a nih. Chuong thuhai chu hi lekhabu a hin hmu dingin a um. Pielral lȗtna dinga an inchawng dânhai, sesun le khuongchawi thawa an thangsuo dân, thangsuona dinga râl le sahrâng an that danhai kimchang takin a târlang a. Chun, tienlai pielral le tulai pielral; Krista ringtu ei hung ni tak leia pielral lȗt ding ei ni lem tak ziethai a tarlang bawk a nih. Hmar mythology sinsiena lekhabu ṭhatak nia hriet a nih.

Ṭobul, Volume II – Issue No. 04, Tuolbuol – Thlado 2025. An e-Journal of Hmar Literature Society Delhi.