Pu Thansung Thlahrâng – III
(Chuonga Sipai Hrila a thi dân chanchin a hril zo chun kan to ṭhap a, awi ding le awi naw ding khawm hriet an tak hle. Zân a sawt met tah a chu a dang la hril nawk pei dingin kan nawr a. A hung hril zawm peia.)
Leh, chuonga ka ruolpa sipai Hrila’n a mi zuk thisan el dan le zân a ka chunga thil tlunghai kha ka ngaituo chun ka um an hawi thei ta reng reng naw a. Kan venga chun sawt tak um chia kan ngai ta naw leiin khuo dangah kan pem tah tawp a. Vangnei thlak takin inruok kei ka hluo tawk chau pakhat a lo um hlau leiin ka thuomhnaw neisunhai chu ka deng lut ta rawk a. A in neihai an fel bawk bakah khawtlang mi reng reng chun an mi ngaiven leiin inhawi ka ti nghal el a. Chuongchun, khawsung mi nina neiin ka khawsa ve tah a. Chu khuo chu in 50 bawr vel chau, khuo inthuruol tak khawm an ni nghe nghe.
Ka in kawl el lai chun dâwr pakhat a um a, chu chu khawsȗnga dâwr pathum um laia pakhat le dâwr lien tak a ni nghe nghe. Anni chun Sumo pakhat an nei a, driver dingin tlangval fel tak el Hminga an ruoi bawk a, kan veng le Tuithaphai inkar an service a nih. Chun nau nunghak hmelṭha em em Roslyn annei bawk a. An sungkuo an inthuruolin inza an um a, an thawna tieng tieng an tluong hle bawk. Roslyn a u pa khawm chun a nu le pa an za ȇm ȇm a, a pa leh an inthlawp chawt a nih ti in la hril suol naw mei nih. Chun, an driver Hminga khawm chu an nau reng ding awm awma pieng ni sien a hawi hiel a. Thu a awiin an pȇk zo ȇm ȇm a. Sum le paiah a ringum hle bawk niin an hril hlak. Kan in an hnai leiin Hminga chu ka inah a hung lȇng rawp hlak a, mi ṭawngnuom le tlawmngâithei tak, neka upa inza ȇm ȇm a nih. Roslyn khawm a hmȇl a ṭhain a pieng an fȗk leiin kan vȇng tlangvâl taphawtin an inchu ti tia chu Hminga le a rȗka inngâizawng an ni leiin tukhawm dit le sai a nei ngai nawh. Kei chu a ruka hretu ka ni leiin Roslyn khawma a mi ditsak em em. Ka fâk phâk naw ding le ka chang phak naw ding ding ka fâkin ka chang hlak, ama zârin.
Kum khat zet zawt chu ka um ve dȇr chu a lo ni ta zing el a. Kum tâwp Krismas tâwm chun Roslyn chu dâwr thuomnaw la dingin apahai chun an tir a, an motor-a fe ding ti a nih. Ngaizawng le fe ding an ni bawk leiin Hming le chun a rȗkte’n an hlim dȗn hlein hriet. A nu le paruok chun iengkhawm an hriet nawh. Kei khawm a hmaa mi suokbuoitu vet khan a mi zâmsan tah a ngaiin inhawi ka ti ta ȇm ȇm a. Lungril pângâi putin mi le sa lai khawm inhawi ka ti ve ta hle. Roslyn hai chu passenger a bit tâwk phurin an motor ngei chun zân dar 6 chun kan inthla liem a. Kei khawm chu zân chun leng suok lova zal el ding chun kan siem a. Dar 8 vel chun ka thuomhnawhai inthlâkin zâl zai ka rel tah a. Khum ka kai hma char chun tukver chu lungtum kuttum tiet ding awmvela deng rak ri chun a mi sukching dawt a. Ka va hawng a, ka hei en kuol hlaka iengkhawm ka hmu si nawh. Ngai ṭha mang lo chun ka kal nawk a. Ka kal zo char le inruolin a hung inri nawk a. Chu tak chun leh, a hmaa ka sungril mi mantu ṭitnale danglamna chun a mi hung man nawk tah a. Ka tha an lap a, Sipai Hrila le Ramsang thi laia ka um dan char khan ka um nâwk tah. A mi mâksan tah ka sawn chu a mi lo mâksan aw zawng nawa. Bang inri dawt dawt chun thli chun a hung mȗt nâwk a, tukver ka kal zo chau hun a hung inhawng nâwk a. Thla chu a var ṭha ȇm ȇm a, tukver a chun a hung inkhawlut a. Ieng angin ṭi lang khawm tukver kal lova sie el dan a um naw leiin va kal nawk ka tum a. Chuonga tukver kawtkhar kal dinga ka hang kei chu ka kei thei ta reng reng dal a, tha hrat tak pakhatin a man niawm tak chun tukver kawtkhar chu an tang tlat a. Mak ka ti ȇm ȇm a.
Chulai tak chun faifȗk hler hler ri ka hriet a, tukvera inthawk chun lampui phei chu ka hei en a, mi pahni hi an hung lâwn phei det det a. An hung hnai pei a. Chu lai tak chun tukver chu ka kal thei ta hrama. Khawsung mi khawm a meng an la um a ni hi tie tiin ka ṭitna khawm chu a ziea hung um deu a. Anachu, a zie a um sawt naw hle. Tukver ka kal zo ta maw ti le inruol chun sumphuk chu a hung inri dawt dawt a, ‘Sunga, Sunga,’ tiin an mi hung ko khȇk a. Chu zet chun le ka ṭi ti chun ka umdan chu a chenve khawm hril phak naw nih. Asan chu rawl pahnia mi hung kotuhai chu ka hrietchieng tlat si leiin a nih. A hmasa lema mi kotu chu a hmaa a chanchin ka hril tah Ramsang khaa ni a, a dawttu chu ka hril ta tho Sipai Hrila rawl ngei a nih. ‘Kawt hunghawng ta la, Sunga,’ a hung ti nâwk lem chun bang kan de chawr a, tlânsuokna dinga um si nawh, tlânsuok ieng ang lang khawm a ṭangkaina um chuong naw nih, ka tuok ding ding chu ruo tuorin ka tuor a ngai a nih ti khawm ka hrietchieng hle. Iemani chen hnunga chun, kawtkhâr chu a hung inri rawk a, ngai ta, Hrila le Ramsang, kum hni deuthawa thi tahai kha baua zer kai hnuongin an hung lut a. Hrila chu an nui huou huou a. Kuva fakna ni mang lo thilsen a baua kai nuongin Ramsang chun a mi nuisan bawk. Hril chun, ‘Ruolpa, i lo inpȇm hla bâk a, kan zawng ngat ngat che annawm,’ a hung ti nawk nghal. Ka nakawr ka hip a, ka mit kan sȋm a chu an ṭawng chieng ȇm ȇmin ka hriet a, an hmel chieng ȇm ȇmin ka hmu zing bawk. Ramsang chun a tawpah, ‘Inleng i dit hmȇl naw ngei mi khawm lo lawm lo che, an hnu ta ȇm ṭinsan phawt ei tih,’ a tih a. Ri um ṭhak lo chun an suoknghal a. Kawtkhar chu a hung inkhar zui ve nghal bawk a.
Inkawlhai ina va riek el a ṭha manih tia kan ngaituo lai chun leh, kawtkhar chu a hung inkik nâwk dawt dawt a. ‘U Sunga, hung hawng rawh,’ ti ri ka hriet a. Kan chawm rak nghe nghe. Kan ching nasa khawpel. Chu rawl chu tu dang râwl an nawh, zântienga Tuithaphai pan kan thla liem Roslyn râwl ngȇi a nih. Ka to ṭawk ṭawk a. A nakie chun Hminga râwl ngei chun indak hlawkin, ‘U Sunga, Hminga ka nih hung hawng rawh,’ a hung ti nâwk a. A râwl a ni chieng em lei chun damte’n ka fe a, ka va hawng tah a. Inthin dawrdawr chun an hung lȗt a, Hminga chun, ‘Ka motor a sie a, kein kan hung kir tawp a nih. Vawizân chu i nah riek el kan tih kan pahni’n,’ a hung ti a. Ka ṭitna khawma re met ta bakah chuonga thil ka tuok zân taka ruol ka hei nei chu ka lawm hle a. Hminga chun, ‘Nakie khan mi pahni’n an mi hung lekhȇl a, i umna lei in an min dawn a, an hung am?’ a ti a. Mak ka tie ȇm ȇm a. Kei chauin ka hmuthei ka sawn kha mi dang khawmin an lo hmu thei zing a ni hi tie ka ti lungrila. ‘Aw an hung ngei,’ ti charin ka dawn a. Roslyn chu a ṭawng nuom naw hle a. Tap bulah an ṭhunga a en pangai a en chur chur a, ama a ang naw rakin ka hriet. A hma nȇkin a hmȇl khawm a ṭha lem nin an lang a, ka ngaituoa Hminga chu vangnei ka ti thei hle. Bu kan suong a, dar 11 vel chun an fâk a, Roslyn chun a fâk râwn hlea, nunghâk lai taka chuog zât zât a fak el chu mak ka ti hle a. An sawl nȋng a tih ka ti tawp a. An zalna ding ṭuongah ka siempȇk a, an zuk zal leinruol chun inngaizawng e ti lo chun inthem ṭhak lovin an in bawr bawr nghal a. An inhnar bur bur a, mak ka ti ȇm ȇm. Chulai chun thlipui a hung hrang nawk vȗk vȗk a, bang inri ṭhawt ṭhawtin a hung mȗt a, khawm chun an ṭhanghar chuong naw rȇng rȇng a, mak ka ti zuol ȇm ȇm a.
Zing dâr khat an ri ta dim ti awm tawk vȇl chun kawl an lep zak zak a, vân a hung innim a, ṭȇk chu inring deu deuin a tla bawka, ṭitna’n a mi hung man ṭan nawk a. Minute khat khawm ka la in naw hrim hrim. Tukver khawm chu an ri tlawr tlawr a, ka ruolhai pahni hlak chu an lan hnâr burbur zing si, ka hei en a, ngâi ta; an zâl hlim khan chawr tieng an lu an innghat bawk si, tuol tieng an lo ngha dai ta chu a ngaina rȇng rȇng ka hriet nawh. An tho hmȇl ka hriet si nawh. Chuonga mak ti ȇm ȇma ka um lai chun ka hung zawi riei riei a, ka khawngat a hung buoi a, ka mit an vai rum rum a, iengkhawm ka hriet zui ta nawh. Ka hang ṭhanghar chun khuo a lo var uor ta a, ka ruolhai chu ka zuk en chun an lo um ta rȇng rȇng nawh. An puonpha le an puonsil chu a lo inthlep khawk a, intieng an lo fe tah ning a tih tiin ka hei suok tum leh, kawtkhâr chu ka kal ang char khan a lo lan kal bawk si. Hi zet hin chu ka bei a dawng nawk tah ie. Inrang deu chun kawtkhâr ka hawng a, Roslynhai in tieng chun ka hang fe vat vat a, an tuol ka tlung chun kawt a lo inkhar vawng a, ka hei kik a tukhawma an mi dawn nawh. An la tho naw ni ngei a tih tiin ka kȋr suk nawk ta a. Chu lai tak chun motor pakhat a hung tlân a, ka sȋra chun a hung châwl a. Driver le midang pahni an chuong a.
Mi pakhat a hung suoka, “In vȇnga Sumo neihai hi khawlâm an in?” a hung ti a. Kei chun ka sak chara in chu khȋk malamin, “Iem an ta leh?” ka lo ti a. Ama chun, “Kha Sumo kha zândar 10:30 vel khan kan vȇng kâwl lai a accident a, driver le nunghâk pakhat an thi a, a zân azâna hung tlân kan nih,” a hung ti a.
Ka lu chu an vir chum chum a inrang deuin Roslynhai in tieng chu ka pan tung a, an kawt chu ka nawk rak rak a, an hung thoa thil um dan hrilin khawtlang ṭhuoituhai kan intlun nghâl a. An rang thei angin chu motor chun nunghâk tlangvâl chuongin an accident-na hmun tieng chu kan pan nghâl a. Ngaituo mumal ka nei thei nawh. Zâna ka ṭuonga riekhai kha tuha’m ni tâng an ta leh? Indawnna ngawt indawnna ngawt a nih.
Ṭobul, Volume II – Issue No. 03, Thlahmur – Mimtukthla 2024. An e-Journal of Hmar Literature Society Delhi.
Comments
Post a Comment