Mâni Ṭawng Humhal

Isaac Hmar, Joint Editor

Siemtu Pathien-in hnam tam tak a lo siem ang bawkin chuong hnam hâi chu ṭawng a mi siem pêk seng a nih. Ṭawng hin ei nîna lê hnam ei nîna a mi tarlâng chieng pêk êm êm, entirnâ'n: Hmar ei ni chun, ei ṭawng ei hmanga, ieng hnam am i ni a? tiâ indawn ngâi loin ei ṭawng khan, ei hnam kha a sukchieng el hlak.

A bîkin, ei hnam hi a bûmin ei um naw a, Mizoram, Assam, Manipur lê hmun dang danga hâi ei um a, a mi khaikhâwmtû chu ei ṭawng hi a nih. Hi lê inṭhe thei lo le inkawptlat a um a, chu chu ziek hi a nih. Ei hnam khawm ṭawng chu lo nei de inlâ khawm, a zieka ziek thei a, ei neina hi a la hnai êm lei hin, ei mithiem hâi khawm an buoina rawp chu nîin a'n lang.

Ei history an hei sui tak tak a, chiengtaka a ziek lo um ta lo chu, țawngbâu ringawt ani leiin, mi tam tak an râwn hlak de a chu, an hriet dân lo inang ta lo; hi lei hin, nasatakin ei buoi a nih. Hi hi ngaimak ding khawm a ni hran nawh, thilum thei hrim a nih.

Tûlâi khawvêla lem hin chu a ṭawng el ni lo, a zieka ziek hi ei ngâi pawimaw ta êm êm. Court-ah ngat ding lem hin chu, a pawimâw zuol. Ei ṭawng ziek theia a hei um ta lem hin chu, ei vângnei zuol hlê. Bible, Hlabu dang dang lê lekhabu ṭha tam tak ei hung nei a, la nei pei bawk ei tih. Chu bâkah, ei ṭawng humhalna, ziek dan lê ziek dân thuah hnam pumpui huopin Hmar Literature Society (HLS) hâi ei hung nei ta pei a, ei hnamin an lâwmman ding khawm ei siempêk thei nawh. An theina zawnah theitawp tak meu suoin hmâ nasatakin an lak.

Khawvêl hmasawnna lê inzawmin, mithiem hung suok peiin, ei ṭawng ziek dân thuah mâni âwm thu suokâ ziekâ kei danglam ei hung um ta pei a, a pawi êm êm. Hienga ei fe pei a ni chun, ei hnam ṭawng lê ziek dânah harsatna lien lem tuok thei a ni ring a um. Ei mizie hi ei inthlîrlet chu a pawimaw êm êm. HLS sin ding ie'm ni tang a t'a? Mâni'n ei nuom ang senga ei ziek a ni chun, ei ṭawng hlutna nasatakin a thlahnuoi ngei ngei ding. Ei hmâ tieng lekha ei ziek dân hin mi la keidar vawng a ti a, ei thû dit seng bawk ei ti a, a tawp chu boralna ni pal rawi a tih tî hi inlâu a um hlê.

Chuleiin, ei hnamin HNU, HSA, HWA, HYA lê a dang dang ei um a, an sin ding lê an thâw ding seng an thâw hi amâwiin a hlu bêk bêk! HLS sin ding ei mimal ngâi dân lê dit dâna kei pêng ei tum chun, a tuortû ding chu, ei hnam tho ani nâw ding maw!? Hnam changkang khawvêlin an ṭawng ei inchûk luoi luoi sapṭawng (english) ei tíhâi hin an ziek dân, an mimal ngâi dân el in an sukdanglam hriet ding a vang khawp el.

Ṭobul, Volume II – Issue No. 03, Thlahmur – Mimtukthla 2024. An e-Journal of Hmar Literature Society Delhi.