Kan Suong Cheu Kan Sûtpuihai

(Hnam Pasalṭhahai Sunna Hlasam)

Lêmang dera, zâihlêma umin, thâwklekhatin, salṭhahai tâwnah, Hmar thlipui
ieng hrângin e;
Ṭhâwngaleivir ang elin, in hringna hlu tak ram le hnam ta dingin in lo inhlân ta
maw!
Thlafam inchang ni khan Hmar vangkhuo a nguoi ruoi ie;
Hrilahaiin kan ṭap inrum, dawn zai reng inrȇl ta si nawh.
Piellei thuoriet hnuoia insakruong zâl ding chun kan la phal lul naw cheu;
Sienkhawm, nu-le-nau ṭap rawl chuh zingkhawvar nȇkin in dawnsak lem ta sia.
Khaw lum, khaw dei, a sûr a sa, phingṭam dangchar tuorin maw!
A va na ngei de aw! Hnam ta dingin vânpui a chim;
Ei dam tlângna dinga fam in chang dân mawl el hi ana kan ti naw thei nawh.
In sakhming ruok chu ṭhang la hung thar pei ding lai famdairiel chang lul naw
raw seh.
Ei salṭha suongum le inzâumhai thina hin,
Zaman Hmâwngthing angin, nang le kei mi zem khâwm sien;
A thlawnin an thisen hlu tak hi in luongral tir nawm ei niu.
Kan thawthei tawk in chun-le-zuo, u-le-nauhai kan sûnpuiin kan tuorpui tak zet
ie!
Chung Pathienin umpui sien, taksa le thlaraua hrâtna tharin inthuom mawl mawl
sien tiin tuorpuina le ditsakna kan inhlân.
Kan suong cheu, kan inro tak zet cheu, kan Sûtpuihai.
An hril Pielral rammawia intawng nawk dingin Mangṭha ngawi ngawi ro le!

Ṭobul, Volume II – Issue No. 03, Thlahmur – Mimtukthla 2024. An e-Journal of Hmar Literature Society Delhi.