Hringnun
Thi dingin ei piengsuok a, hring zing ta dinga ei thi
a țulna Khawvȇla hin,
Nitin nunhlui inchang dingin ni le dârkâr ei inthla
liem a;
Nun le hun a danga, sungkuo hlim deua ei
umkhawm lai hai khawm,
Hunin hun dangah a mi sie a, unau ei in țhe dar
rawp hlak, tienlai an chang phei hlak si.
Sun le zan ei hmang insawkna khawvȇl a hin,
lungngaiin ei țap a,
Hlimna sawt lem ei chang theina dingin.
Sin ei thaw a, ei inhawmthaw rak rak a,
Ei fâk le ei dawn hai ei zal pui nawk ringawt hin iem
a hlutna le?
Thuom le pâr, in ropui le inhawi ei thlâkhla a,
Ei nei ve ngei theina dingin inrim le rinum ngaituo
lovin sin ei thaw a;
Țhenkhat lem chun a mawi le mawinaw ngaituo
lovin,
Mi chan ding khawm inchu rin lo hiel khawpin mani
ei insuklien a,
A tawpa ei fesan ding tho.
"Iengkim in ta" ti ani laiin, iengkim ei tuok thei kha,
Iengkhawm ei ta tak tak a lo um si nawh;
Ei ta nia ei ngai, ei nei po po le ei hringna chenin
zankhata ral le inhmang thei a lo ni si.
Hlimna le lungawina beiseiin ei thlakthla lampui ei
hraw a,
Ei chanpuol ngȇia ei ngai hai chunga khawm thu ei
nei ngai nawh.
Nina insang le ngirhmun ropui hai khawm ei ta bȋk
a lo ni thei nawh.
Ropui ei ti tamtak hin inzaum lo ah a mi siem a,
Thil hlimum nia ei hriet tamtak hin a mi sukna a,
Lungngaina le beidawngna a mi'n tlun nawk hlak
si.
Inhnuoi tak a’nthawkin insâng takah nun hin a mi
vawrkai thei a,
Insang tak a’nthawkin inhnuoi taka ei tla thla vawn
vawn nawk thei bawk.
Ke pen suol pal; vawikhat ke sepsuol leiin piengsuol
ngirhmuna ngir vawng thei mihriem hin a mihriem
chanpui hai chunga chapothei tu'm um ei ta?
Midang enhnuoi le hmusit thei ding khawpin ieng
ropuina am suong ding ei nei a?
Ei hlawtling nia mi lawmtu le kut lo bena mi lo
lawmtu an umnawna hmunah chanvo ropui chun
ieng hlutna am a nei ding leh?
Inzak le muolpho dawn lova ei bula mihai ei sut
thlûk pawp pawp nuomna khawp ngirhmun ropui
chu iengchen dai am a ni a?
Ieng tak hi'm thil hlu chu le?
Naupang innui hmelin a mi suk hlim zo naw chang
a um a,
Van khawm khi mawi takin a pawl zing nawh.
Vangduoi bik le chansie bik nia inngai châng ei nei
a,
Khuonu ruot 'bik' am ka nih in ti chang dam ei nei
hlak.
'Aw le awei' inkara intàng tlat châng hai,
Khumlaizawla thutlûkna siem tuma ei khawvar pap
pap châng a um rawp hlak.
Khum inhawi taka zala imu intuo lo tamtak an um
a,
Ràp in le Ngaidi ina khawnvar éng teng teng le
khawsa;
Sungkuo inhnarum ngâwi ngâwi ngȋrhmuna ngȋr an
um bawk.
Chuong hai po po khawma a tawpa an thlir chu
Vânram chu a nih.
Vanram ngaiin ei inrûm a, Vanram ei thlakthla
nasan khawm hlimna le inhawina tho a ni si.
Kei ngei khawm hin Vanram chu ka ngai hlak,
Ka thlir a, ka thlamuongna umsun khawm 'ka la thi
ve tho ding annawm' ti hi a ni rawp hlak.
Thil inhawi khawm hi angai zinga a fe chun
nghawkum anchang thei a,
A țha naw khawm hi a țhat naw-na fie a ni hma chun
a chieng ngai nawh.
I lut chil naw chun hrietna ringawt chu a chieng
ngai naw a,
Thil chidang dang tawng hi hrietna mi petu ani a,
Tawnhriet fiena chu Sermon ropui a tling si.
Mihriem hin ei thlâkhla le chàk ȇm ȇm chu
ngaithlâk ni hi a ni a,
Nisienkhawm, ei mamaw tak chu ngaithlatu ni hi a
ni rawp.
Ngainuomum tak ei ni theina dingin ngainuomum
naw nuna ei khawsak a țul rawp a,
Ngaithlak tlak ei ni theina dingin ngaithlatu ei ni
hmasak a țul hlak.
Nun hlutna hmu thiem dingin ei nunin a hlut tamtak
ei pei hmang a țul chang a um bawk a.
Ei ditnaw le pei naw zawng tamtak chu ei thaw le
pawm, khawsakpui a ngai hlak.
Inchȗk sângna le thiemna hi Pathien ṭina a țhang
naw chun a bȗl a, a tawp hlak, muolphona el a ni
bawk,
Lekha inchȗksang Ran vêng ding khawma sawr tlâk
lo an um thei.
"Lalpa ṭi hi Varna a nih" ti ziek ang khan,
Inchûkna in (School) hi nunsertu pakhat chu ani
nalawm el.
Aanachu, thiemna mi petu a ni ringawta hrietna tak
tak le, nun tak tak inchȗkna chu Biak-in(Biek-bûk)
lem a nih.
Mi thiem le mivar hi mihran an ni bawk.
Thil hrie le mi var khawm a dang dai a nih.
In chȗk sangna, i thiemna, i ngirhmun kha Pathien
malsawmna a ni zie i hriet nawa, Nang a theina
mani i ti chun chapo i ta, chapona chun muolphona
an tlun hlak si.
Kohhran a’nthawka sersuok naw varna chun, sawt
ropuina a kawl nawh.
Nepoleon khawmin, "Lepchie-na le ropuina hi sawt
deu Khuonu'n a chawikawp ngai nawh" a lo ti kha.
Milien le thilthawthei tak tak iengkhawm ni lo an
um hlak a,
Mirethei le nun tlawm ngawi ngawi mi ropui tak tak
an um bawk.
A hlaw suok ngeia inngaia ngirhmun ropui le nina
insang taka ngir ngei khawm kha,
In ngir tirtu chu retheihai siemtu Pathien tho anih.
Mani mihriempui hai chunga lainatna inlangtir a,
zawldaw tak hai hin mi inza an phur tak hlak.
Ei damsung sáwt naw te a hlu tak chu, phutlȇt um
dȇr lova midang ta dinga luongsuok hi a lo ni awm
e.
Tui luong suok naw chu dâwn tlâk a ni si nawh.
Tuta i hluo mȇk ngȋrhmun insâng kha i chang
kumkhuo ding bik a nih ti i chieng ngam tak tak am?
Khawvȇl hi an vir zing leiin nina le ngirhmun an
thlâk zing hlak si a.
Midang thaw țhat inpâk rin naw la, inpâkna dawng
hlak i tih.
Mi changsuol le changsietna ah țhangpui rin naw
bawk rawh.
Thil țha thaw nghawk naw la, i thaw pek haiah
lawmman i dawng naw khawmin,
I thil țha thaw chu Khuonu'n vawng pek ati che a,
hmun dang a’nthawk bekin i țhatna chu i hmu let
ngei ding a nih.
Fel naw taka thaw hai bawk hi a nih ei lo inhnar
hlak ni!
Fel le indik taka thaw hai ruok chu ei lawmpui el.
Hremna hi taksa a anlang neka sungril tieng
inthiem nawna hi tuor antak lem rawp a.
Mi ngai neka mani ngaia mawi le țha thaw hi a lo
țha hlak.
Mi’n an mi en naw khawm ani thei, mani bek inenfie
hi nun chawlna khawm a nih.
Thangpuitu, țantu, kut mi benpektu ei hmu tanaw
khawm a, inhrilfie ngai rawp nun ei pai ta chun ei
ke pen a'n phet vang vang tah ti na a nih.
Midang kuoma țhat insuo dingin nakie hun nghak
naw la, nakie hun chu midang chan ding khawm ani
thei si a.
Kraws-a bán phar meua thi ve naw ta ding chun,
thonawkna nun nei thei ani naw a, nun tak tak hriet
an tak hlak.
Nun hi mitthli luongna mit an naw chun, a khaw
hmu a fie naw rawp hlak.
Piengthar, mifel, mi'n 'țha' an ti rawp nun khawm
hi kei hin ka thlier hrang thiemnaw hlak,
Kohhran le sungkaw bil ta dinga mi țangkai,
inpaktlak le fel an ti sup sup;
Țhenum le midang ta dinga luongsuok ngai dȇr lo,
Mani hamțhatna le phingpui ringawt ngaihtuoa hun
hmang hlak hai khawm mifel an ni si.
Lem takin, a derin i khawsa thei a, i țawng suok thei,
Anachu, i nun tak tak chun milai thuhril tho a tih.
Lem changna hin eini le eini bak a mi huopnaw a,
ei ni le eini ei inhlem tak hlak.
Midang nina le an dinhmun le inkhaikhina, in-el
ding hin Khuonu hin ami duong naw a,
Ei nina le ngirhmun dinga a mi sie na ah,
Ringum le huoisen taka um a, mawi taka par ei
insuo el hi a hun em em a nih.
Ei thil dit le ei thil nei hai ei inkhi chun ei lung a
awi thei naw a,
Ei chan hai, ei malsawmna hai hi ei Phu lei hrima
nei am ei nih tia ei inensin ruok chun, ei chanawkah
ei lung a awi hlak,
Lungawina khawm hi ei thil nei haiah an nghat naw
a,
Ei lungril pawm danah an nghat lem a lo nih.
Mani char inngaituo a, mahni țanghma chau ngai
a,
Mani chau inhmangai a, midang sie hnuoitu chun,
Midang a’nthawkin malsawmna a dawng ding tam
tak a pal baw hlak.
Thaw pal thilthua siem ei ni naw seng a,
Mi thil nei le hmela khawm ni lo, ei nina ang ang
hin lungawi pei khawm a țȗl.
Mi thilthaw le chan rama insuk lungawi le lo hlim
tum hi an tak hlak.
Mi ringna dam lo va dampui tum hi thil intak a nih,
Ei ringna chit hi ei dampui ding ani bawk.
Mifel famkim ei um naw na hin, tu'm a țha a, suol'
ti hi ei lo inkhi le lo rel ding an naw a,
Mani nun inenlet hai chun midang hrilsel le midang
relna hun an nei hman nawh; Nitinin insiemțhat
ngai ran mihriem ei ni si a.
A țha le fel, andik khawm ka thlier hran thiemnawna
Khawvȇl a hin,
Thil hlu le ropui tak ka pȇk suok thei naw a ni
khawmin, ka chanvo a um țha taka ka thaw a,
Thiltha naw ka tlansan hram hram nuomna chun
nun ditum lampui tieng a mi țhuoi pei ti ka hriet si.
Ka ta dingin misuol le tha hriet a țul naw, ka neka
midang hi tha lem vawng an ni si.
Midang demna ding khawpa a tirdakumna,
hmusitum a nina i hrietchieng ani chun nangkhawm
i țhang ve ti na anih.
Chier-ah i keilut ani chun, nangkhawm i ber ve
dinga, bal ve ngei i tih.
Ngilneina i tu chun, hmangaina ra sîk i ta,
Mani hmasielna lungril ringawt chun dawng ding
ruok a dap a,
Nuorna ding a hmu zing hlak,
Krista lungril puttu chun a nei ang ang pek nuomna
a nei a, lungawina’n a chenchil hlak si.
An hrilsel le dem, nuisan le hmusit hlak tamtak hai
hin,
Khawsawt le lungngai an hnem a, an nei sum le
puon an inpàm der si nawh,
An hmaikawr hai hlîp a, in thuomna bal hai an hlîp
phat leh,
Aw, chu hunah chau chun kei mimawl hin misuol le
mi tha hrethiem táng ka tih.
Aw Hringnun!
Ṭobul, Volume II – Issue No. 03, Thlahmur – Mimtukthla 2024. An e-Journal of Hmar Literature Society Delhi.
Comments
Post a Comment