Football le Fâk Zawngna

Upahaiin “tum chun lampui a um” tiin thuchâng mawi ém èm le indik an lo sâksuoka. A hringa Ván-a lâwn ti chau naw chu a’ndikna chin umin a’nlang tah. Mihriem thiemna le varna a hung insáng pei tâk lei a nih. Mi thiem tamna hnam Hmar khawvêl a hin ei in hnuoibîk naw hle nih. Amiruokchu, hlawtling ding chun kawng tam tak hraw ding a um ve. Chuonghai laia ṭhenkhat ei lo hrietsa khawm nisien hang suklang ei tih.

Taimâkna

Kawng tinrenga taima hi a pawimaw hle. Ei ṭawngkasuokin “Taimak hi Kâwng chauin a mâk” a tawpa chu hlawtlingna a nih. Mitin hriet ta sa lo nisienkhawm, a takrama pala zâwm hi chu a pawimaw hle thung. Hlawtlingna hi mihaiin imu inhnik taka an in kâra chang a lo ni lem si a. Ṭâl ṭâl na nun hi hlawtlingna dinga pawimaw le a fûr a ṭhâla hnawt a pawimaw. Mi tam tak a bul ṭana a tâwp tlung zo lo ei um rawp hlak. Hlawtlingna lampui a nih, ti hrezingin taimâk insuo harsa ei ti a.

Thlasik zîngkar Ṭieusûm nêra Savunmûtpuom hnawt nekin Rizai hnuoia inherkâwi kâka zàl chu anhawi lem bawk a nih. Hi ruok hi chu hlawtlingna chun a mâk hle thung.

Insûmtheina

Hmar Infiemhaiin intak ei ti tak pakhat chu Insûmtheina hi a nih. Ama hi tu’m a n’a? A Nu le Pa hming iem? Khawlai khuo’m? Ti thei dêk dêkin ei hang um a. Ka sil tiin ei hung insawisêl ṭan a. Hrât lawmna ei hang thaw ṭana, zântieng ni nêma lampui sirchim inlau ni âwm takin kal ei hang pên ṭan hin hlawtlingna ding a mi dâl ta hlak. Infiemna rêng rêng a hin hrâtnaw châng a um hlak. Chu huna chun lungril hadam na dingin, In tlung hmain tuhai kuoma’m a nih, sungtê ei hang thaw nâwka. Hrât leh hrât lâwmna, chuongang bawkin hrâtnaw leh hrâtnaw lungril hadamna le silrena ei ti nawka. Hi sala intânga awngrawp tam tak hmu ding an um tah.

Khawlai Tournament amanih vawikhat ei hang che ṭha meta, khobaka tleirâwl feet 5 chen ding bak bak, anrâwl khawm la ṭê mumal theilohai râwlri khawm hi a tuor zo lo tam tak ei um hi a pawi tak zet a nih. Hlawtlingna khêla um ding âwm taka inlanghai ei hnawt hmasa lem leiin, ei hlawtling thei naw nih.

Hieng Nuhmei-pasal, Inruithei le thil ṭhalo fâk le dâwnn kawnga insûm hi hlawtling ding chun mâkmaw chu a nih.

Sum hnawt

Khawvêla chêng ei ni leiin sum le puon hi mitin pawimaw chu a nih. Sum ngainat talaw ruok chu suol a ni thu Bible meu khawma a mi hril. Football le hrilzawm nizie hlak chu Sum hi a nih. Ballpêta fâk hmu tumhai ta dinga thil ṭha le lampui pakhat chu Sum hi hnawt hmasa taluo lo ding a nih. Local Tournament ah tlawmte te ei hnawthai hi ei sietpui tam tak hmu dingin a um. Kha tlawmte i hnawt leikhan, tlawmte in i lung a hung âwi ta a. I Ballboot man khawp i hung hlaw meu chun, i kum a lo tam nâwk ta si a. Club kumhlun le ṭha ei banphâk ngai naw nih. Mi tam tak Club lien lema an umlai, Village/Local Tournament ding leia an Club maksan hmu le hriet ding an um châng lungril a na hlak. Pawisa hi hnawt nâw’ng ei ta. Pawisa hin mi hnawt lem raw seh. I thiemna in a phâk chun hril ngai loa um sa a nih. Pawisa hlaw loa inhnel ding tîna ni loin, tlâwmtê ei hlawdawk hin ei lung a awi awl taluo ei ti lem a nih.

Ei inhnik zo am?

Zawna lien tak a nih. Nu le Pahai khawma ei nauhai an hlawtlingna ding chun, ṭhang nasa nâwk zuola ei lâkpui a ṭûl tak zet. An inhhnikna khawm uksak loa, nau an ni lei ela mawrlui hi a fûk tak ta naw el thei. Football hin fâk hmu thei a ni tah. Hmar khawvêl a khawm Football Academy ṭha tak tak a um tah. Ei nauhai khawm an thiem thil le an inhnikna enpui zingin, khawvêl lien lem thlir thar nawk zuol ei tiu. Chun, hriet dinga pawimaw ém èm pakhat chu, nauhai Academy-ah ei hang sie ve a. Hun tawite sûnga fâk an hung hmu el naw leia lunghnuol hi thaw naw hrâm ei tiu. Taima tak le tumru taka nauhai leh ei ṭhangkawp chun hlawtlingna hi mihai ta a ni bîk nawh. Hlawtling tak tak chuong naw nih. Tî lungril put loin, mihai khawma an thei chun ei thei ve annawm tiin Nu le Pa khawma nauhai ṭhang lapui tak tak ei tiu.

Hmar nauhai hi infiemna a hin mi hnuoi ei ni bîk nawh. Eini neka tlâwma khâkhmul hau deuhai nêkin thiemna ei nei lem. Ama hi chu a Zaper char a thlep thei a nih. Tî ding âwmtâwka inkawnhai hman taima takin an thaw thei chun, eini inchukna tak tak neilo piengpui thiemna neihai hin insûm ngaihai insûmin, hotuhai inzathiem inla, iengleiin am ei hlawtling naw bîk ding a? Mihaiin thil an mi hrilhai theinghil loa, a ṭhatna lai lâk hi a pawimaw hle nih. Mi pakhat ballpet lo chawlsan tain thil a mi hrilhai zuk siehnuoi tum el chi dâm, kei ka nih annâwm tihai hi a pawi bêk bêk a nih. Mani neka lo Senior lem dâm, Coach le Higher Authority thû zâwmlo hmu ding tam tak an um a. An chuoi pha rawp hlak. An’nawchun, zantieng ninêma, ruolhai le inṭhung bûma a hmepi ding tlawmte le mani thiemthu hril chau hmabâk pal ei tih. Taimâ insuoin, tumru takin, insûm dinghai insûmin, ṭhang la thar ei tiu. Iengtik laikhawma thuawi tak le taima taka hun hmanghai chu hlawtlingna le pawisain a hnawt hlak a nih. TV 32 Inches a lienin, Hmar Hnam puon i bât le Hnena Nopui i châwilai tu’m a en nghawk um an ta? Aw Hmar tlangval har la, ṭhang la thar raw leh.

Ziektu chanchin

Tv S William hi Thiemna tienga MA Political Science niin, HSA Tuiṭhaphai Joint Headquarter ah Secretary Games & Sports nina lo chel ta hlakin. Football tienga AIFF le AFC Coach License nei a ni a. Zeal SC le Hmarram Football Academy ah Head Coach niin, Sinlung Football Academy le a dang danga khawm Coach in a lo ṭhang ta hlak bawk a nih. October 2024 chen kha Barcelona Academy Coach in a um a. Club Puitling lema contract sign dinga um mêk a nih. Tuhin Sikanderpur, Gurugram a um le khawsa mêk a nih.

Țobul e-Journal chun Pathien malsawmna dawnga hrilselna ṭha leh ram le hnam ta dinga a thiemna varna hmang pei dingin ditsakna an hlân.

Ṭobul, Volume II – Issue No. 03, Thlahmur – Mimtukthla 2024. An e-Journal of Hmar Literature Society Delhi.