Ei Rama District Headquarter

Ka thilziek hi ieng khuo khawm ka ditsak bîk nawh a, Hmar mipui tam lemhai tâ dinga țha le remchanga ka hriet lei a nih. Ngaithiem lo le lungrilna dâm an lo um pal chun ngaidam ka'n hni. Thanlon Sub-Division laksuok a ni ta leiin Hmar khuo Jiribam District-a mîhai hi laklût nisien, an khaw hming hai hi Hmar hminga thleng ni tâwl sien.

District hming khawm khawmal hming ni lovin “RUONGLEVAI SUO” tî nisien. District Headquarter ding chun, Hmar biel, Vangai le Tuiruong dung lungrila siein a hmun lailung le remchang, entirna dingin, Senvon lê Lungthulien inkar tlâng dung a dam hin village Authority hai in a thlawn lieu lieuin ram lien tawk pe hai sien, chû an pek sûnga chun mimal tukhawma hmun nei phal ni naw sien. Dist. Hqrs.Complex ding chu mithiem hâiin plan țhataka siem ni sien. Chutaka chun D.C Office lê Sawrkâr Department dang dang Office le Quarters hai um sien. Chun play ground, Football field puitling, volley ball, Cricket, Loan Tennist, Swimming Pool etc. um bawk sien. Chû bula chun Community Hall lien tawk lê Indore Studiam, Badminton, Table Tennis, Boxing ring etc. inkhel theina um bawk sien.

Vanruotui siekhâwlna dingin muol le muol karah tui tingna siem ni bawk in tinin kawm tui sie khawlna siem ni bawk sien. PHE Engineer pakhatin a hril dân chun, ei rama hin chuh vân ruotui a tam a. Rângva phêk khat a ruotui po po hi dawkhawl vawng inlâ, kumkhat ruotui chun mî pakhat kumkhat hmang ding tâwk tui a um thei a tih. Hienga ei thaw chun hmun danga mî lak lo khawma tui chuh ei intodel thei ring a um. Chun Children Park țha tawk um bawk sien. Rest House/Tourist Lodge le khuobuk man tlâwma mikhuol tlung theina um bawk sien.

School lê College ṭha tak um bawk sien. Botanical Garden siem nisien. Chutaka chun ei rama Thing le Ruo chikim sie inlâ, chun ram ngaw um thei bawk a t'a, Vate hâi hung khawm an tih. Tulai chu, Sawrkâr hmunpui ding chun khaw umsa ni lo, ramruokah țha taka plan siemin an thaw hlak.

India khawpui Delhi dâm khuh a hmâ chun Old Delhi a khun Central Secretariat a um hlak. Tûtâ New Delhi dâm khuh hmun tharah plan țhataka siem a nih. Tu hnai el a khawm Mynmar (Burma) Sawrkâr chun an khawpui hlui Yanggon (Rangoon) a inthawka 372km a hla ah an Capital thar Naypyi Tawah Sawrkâr hmun pawimaw hai an sawn. Mi țhenkhat hril ka hriet dânin Tipaimukh rood khawm hi plan hmasa a chun Lungthulien, Senvawn, Rawvakawt, Sipuikawn, Tipaimukh a ni a.

Chun Senvawn mi țhenkhat in BRTF Engineer an lo vuok leiin a dang tieng an her a, tûta mî Lungthulien lê Tipaimukh inkâr lam lien nasataka thlepkuol nêkin a grade a țhain a hnai lemin an hril. Chuleiin plan hmasa ang khin siem nisien. Thilthaw reng reng nakie kum tam la hung um ding pei ngaituona siem a țûl.

Ziektu chanchin

Pu Lala Khawbung hi Chairman, Mizoram State Law Commission mawphurna chel lai mȇk a nia, hi mawphurna hi Minister of State rank ang a nih.

Pu Lala Khawbung hi kum 1977 khan Delhi University a inthawkin LLB a zoa, Gauhati High Court hnuoiah Advocate kum 10 chuong a practice hnungin kum 1988 khan Pu Laldenga, Mizoram Chief Minister ani lai Mizoram a sin thaw dingin a fiel a. Chu dungzui chun Mizoram Judicial Service (MJS) a sin thawin kum 2010 khan MJS Grade-I a inthawkin a lo pension a nih.

A penson hnung hin all India advertisement dungzuiin le personal interview hai fethlengin, 27th January 2011 khan Joint Electricity Regulatory Commission for Manipur & Mizoram hnuoi a Deputy Chief (legal) post sin a zawm nâwka, hi sin hi term 13 lai a chel a nih. Tu hin Mizoram sawrkârin a thiemna la sawr ṭangkai peiin Chairman, Sate Law Commison sin an chel tir a nih.

Pu Lala Khawbung hi ram le hnam, khawtlang ta dinga miṭhahnemngâi tak el a ni a, a hrietna, a thiemna le a tawnhriethai hi Hmar hai ta dinga encyclopedia ti thei hiel a nih. Tuhin a nuhmei a nauhai leh Aizawl a chȇng mȇk an nih.

Țobul e-Journal chun Pathien malsawmna dawnga hrilselna ṭha leh ram le hnam ta dinga a thiemna varna hmang pei dingin ditsakna an hlân.

Ṭobul, Volume II – Issue No. 03, Thlahmur – Mimtukthla 2024. An e-Journal of Hmar Literature Society Delhi.