-Upa Hlikam Riengsete
Mi Pakhatin a nâu sûnna hla a phuoka
"Aw hrâibûng tuoi hrâichâwi thlafam chang zûn ngai a na ie.
I lenruolhai lê intuolchaina ka thlîrin riel ang a dei zo tah.
Zuong tho thei chang la ka va nuom ngêi;
Tinkim dâwnin i pûr a thar pei sî maw!" tiin.
Hmar pî le pû hâiin, "Thlazing thlâin phalbi Ârpui tiet phunchawng kâkpui-ah a'n țhung tah" an lo tî ang ni ta vêng a tih. Thlazîng (August) ni 7 thawțanni tûk khawsak tieng nisa suok êngphut el chun, kan sumphuk bathlâr a hung sun tle sur el a. Chun, nilum âwipuma tiem ding ti'n, Suitcase sip țula hmar țawnga chanchinbu kum 40/50 sûnga mi țhenkhat ka lo hrețhathai ka dawmdawk hai chu ka zuk tiem lâwr phêr phuora; chu lê inruol chun, ka nuhmei Lalruotmawi Infimate Riengsete chun zîng thingpui dingin Horlick a mi hung siempêk a. Bei changkâng deu deu Bazâra a hung inchâwkhai chu a mi hung siepêk țeu bawk a.
H.S.A Hqrs. Chanchinbu inchûklâinun Pu Hrangchalkhum lê Pu Darsiemlien Ruolngul haiin H.S.A. Gen.Hqrs an țhuoilâi Parbung H.S.A Gen. Assembly political boycot ani thu dâm, mi țhenkhat nungchang fello deu dâiner ching deuhai zil le kâwkna colum Hmaitlai dâm, ka zuk tiem a. Pu WR Pudaite in lungril suongtuona inthûktak neia a chanchinbû thlakip suok țhuoitu abuotsai dâm, Allahabad Bible College-a Hmar mi Bible inchûkhâiin Sîkhawvar an lo insuo dâm, Aizawl Mizoram tienga H.S.A haiin Sinlung an hung insuo dam, chun (Famtah) Pu H.A .Lalrohlu-in chanchinbu bêlchieng dâwl êm êm el SHAN a'n suo dâm.
Chuhnung deuvah chanchinbu inlâr le ngainobei tak el SAWRTUI dâm, chun a hmêl envuotkhawma lungkuoi rieu el HMATHLIR dâm, chun, Pu Timothy Z. Zote buotsai țha êm êm el MANMASI DIGEST dâm, chun H.S.A join Hqrs țhuoitu Tv/ Upa Thansung Hrangkhawl-in PALAI thlakipsuok a lo buotsai dâm, chun, Pu S.K Khobung le Pu Lalzawmthang Hmar EX.EM hâiin an insuo NGAIBAN THLIFÎM dâm, Tv Bethel Pudaite lê Pu Darbiekțhuom Hmar haiin HMAR RÂWL an insuo dâm, chun, Simtuiluong H.S.A Unit Editor Pu Hlikam Riengsete râwia BENGVÂR Thlakip suok an insuo dâm, N.C Hills EFCI KȚP hâiin ȚHUOINAVAR Pu Rev Rochanlien Kungate râwia an insuo dâm, ICI KȚP hâiin KRISTA ISU SIPEI (KIS) an insuo dâm, Pu Zion Lalrohlun Faihriem-in chanchinbu ngainobeitakel VARȚIEN a'n suo dâm, Muolhoi ICI K.T.P hâiin 'HRILTU' an insuo dâm Silchar khawpuia inthawkin Pu Vanlallien Pulamte-in a hung buotsai 'ZÂWLLUNG' dâm, Muolhoi PCI P.Y.F hâiin an insuo KANTU dâm, Hmar Literature Society hâiin Thu le Hla thutling hlatling le Hmar țawng sukhmasawnna le humhalna dinga chanchinbu hlû le ro tling Literature umzie hrilfiena a ama mihlû (Famtah) Upa Dr Lalnghawrlien-in THURO a lo inbûk; Tuițhaphai-ah kum iemmani chen lo suok tah; enkawltu lê châwmtu țha nei naw leia tuolsuok thei lova zenghrî ( paralyse) a damnaw chu Hmar hnam le thlarâuva piengthar fel lê chieng, Pu R.H.Hminglien Central Officer chun. HLSM țhuoituhai kuomah hnina pein New Delhi, khawpuiah kum ruk sûng an sûngkuoin țhahnemngaitakin an enkawl a, Pu R.H Hminglien hai nûpa ang hi ei Hmar Officer dang hai hung um vê hâi sien aw!! ka ti vawng vawng el a ni ie.
Kumruk zênzâwn ama sum (pawisa) sêngin amâin Thu le Hla la khawmin a Laptop-a a sut a, offset press-ah a pêk a, a kawppui Pî sari Ralsun in Circulation manager sin thâwin hmuntin hmuntang-ah THURO latûhai kuomah post office-ah a thawn vêl a, an sûngkuo khawsakna pakhata an sie tawp thuhai suongtuoin ka hang suikuol vêl lai chun, ka thingpui dâwnna Noruok la tumin ka nuhmei a hunga "awi i thingpui a dei vawng ani ta hi," a hung ti chun ka harphut a thingpui țhing chu inhniknaw țutin ka la dâwn.
Hi tûk hin kan nâupa Lallienzuol Riengsete Police Inspector-in "upa tieng inni ta a, fâkțha fa deu ro" a ti leiin, bâwngîr le tlangâr an but tûk a ni vei leh!! Hmar țawng chanchinbu piengphung țha êm êm hâi LÊNGLAI THÎ hai pûr a suok leiin, a salamtlâkna in bu le bâwngîr but le tlângâr but ka hang fâka chu, Ka tâizawl a dêng nawh.
Dûthusama sâmluot umlo chu. Ei Hmar chanchinbu famchang tahai po po kha hung thonawk vawng hai sien la ka va nuom ngei de aw !!.
Tûta hring dama la um hai.
1.HMASÂWNNA THAR
2.DELHI THURAWN
3. AGAPE
Hienghai hi hrisêltak hung ni pei hai sien la, Hmâ hung sâwn duok duok hai sien. Chî tam tak hung thlâin Hmar țawng indak hlawk hlawkin hmuntin ramtinah tlâng hunginsam hai sienv la ka va nuom vawng vawng ngêi de aw !!