(I)
Ei tlângram cham dur,
A angsung inhawi,
Muonga kal chawina;
A malsawm thlânin,
Hringnun lam ei hraw.
Salung awi hliein,
Muongten Biekbûkah,
Chung Pathien ei chawi.
Hmasawn hlawtlingna,
Zalênin ei zawng.
Tlâng boruok thieng nêm,
Thlifîmin mi thawi,
Nunsawl ha a dam;
Bawmtu lêntu mawi,
Zaipu lunglêngna.
Thiem inzir dawntuoi,
Chûn le zuo beisei,
Varna ram zuonin,
Thiemna rûn sangah,
Engthawlin an kai.
Rûnsung, sumtuolah,
Rimawi, "Tle-tlai" leh,
Zalêng nun an nuom,
Vânglainun an phâm,
Zotlâng thengthawah.
Râlpui a hung lien,
Hlimlai muol a liem,
Kumhlun thil um lo,
Leihnuoi dân hrimin,
Koin a châm nawh.
(II)
Biekbûk sukchimin,
Ei rothil an raw.
Sa ang mi pêlin,
Rûn lak tum ei ram,
Thlaphâng ei râltlân.
Lunglam an vâi a,
Nun hmang an dên nawh.
Ṭûonsin rêl loin,
Râldo insingsa,
Retheina a zuol.
Nunrawngna a hluor,
Thisen insuoin,
Hringna ei insuot.
Fam dâr ri râpum,
Chengrâng hrat an lêng.
Hmei awm nêm chungah,
Râwp kutthap an nûl.
Nunrawngsâr hmêlma'n,
Piellei vutpila,
Mi'n chan mang an tum.
Theida lungturin,
Chûn le zuo, hraileng,
Thlei bîk nei loin,
Thina râpthlâkin,
Famkhuo an inliem.
Lâi an hâng a na,
Hmathlîr a êng nawh,
Thina hlim hnuoiah.
Hringmi lungril rêng,
Ramsa ang lo nih.
(III)
Tlâng mihrâng,
Pasalṭha'n,
Râl an do.
Zâm loin ram san,
Tlawmngaina chungchuong,
Thlunglu hlân an ngam.
Ram le hnam humhim,
An damsan lungkham.
Suilung hnuol le kîr loa,
Inthuruola kalchawi hrat,
Hmangaitu ringumhai zâr,
Dingchanga ngîr ei nghâkhla.
Depdena kalfung hnawlin,
Dan ṭha vuona kal rêlin,
Hmasawn ram sang mi'n tlun sien.
Thingtlângmi'n,
An beisei,
Inmuolvawm.
Rorêlna khingbâi,
Nghatsan le ensan,
Hmusit le hnuoisie,
Elrelna tinrêng,
Hnungsawn an nuom tah.
Buoina sûmin mi bawmin,
Rinumin inthim sienkhawm;
Chungkhuonu mi huol zârin,
Khawfing la hung chat a ta;
Ei ram rieng tho zâi rêlin,
Lungruol diela lêngna di'n,
Pâr ang vul thar ngei a tih.
Hi hlasam (poem) hi tulai Manipur a tlângmihai buoina'n lungril a kam êm leia hla ziektu hin a ziek a ni a. Hla pakhatna (I) le pahnina (II) khin khawvêl hringnun le mihriem mizie mak a tizie a târlang a, hla pathumna (III) khin thangtlâwm taluo leia, huoisentaka râl beilêt ding le hmêlma laka zalênna beiseinaa tarlang a nih.