- Rev. Joe Sanghmingthang
Luka 1.33. "Jakob thlahai chungah chatuonin inlal a ta, a ramin tâwp ni nei naw ni" a ta.
Ni thla seng lo ram an lo ti khawmin a ropuina a neisawng naw a, Alexander ropui khawmin chuoi hun a nei a, lung anga nghet an lo ti Rom lalram khawm tluksiet hun a nei. Mi ropui tam tak an lo pieng a, lalram ropui tak tak an lo indin a, vul hun an neia, chuoi hun an nei vawng.
Nunghak inthieng Mari sunga hung insieng mihriemhai sandamtu ruok hin chu bul le tawp a nei naw a, chatuona mi a nih. Khawvêl insieng hmaa um, Ambraham, Isak le Jakob hai hun lai khawma lo inlar, Pathien thilthawthei le umnaw lai nei lo "UMA PATHIEN" a nih.
Khawvêl insieng tira inthawk ta khan khawvêla hin lalram ropûi tak tak an lo ngir ta hlak a, amiruokchu ropui sawng an um nawh. Babulon lalram khawm kha ropui tak a nih, an khawpui inhuonna kul bang chunga khan sakawr tawlailir an intlanper zar zar thei an ti hiel a nih. Chuongang lawma lalram ropui chu khawlai am a um ta a?
Khawvel thil po po hi inṭanna nei a ni leiin tawp hun a nei hlak. Isu Krista ruok chu inṭanna nei lo a ni leiin tawp hun a nei nawh. Tuhin mitin a lalram hmu thei naw inla khawm iengkim chunga thuneitu a ni zing a, a thu lovin khawvela hin thil a tlung ngai nawh.
Nang le kei khawm hi inṭanna nei ei ni leiin hi ei taksa hin tawp hun a nei ding a nih. Chuleichun, hi khawvêl chau hi ngaituoa hun hmang liem el ding ei ni nawh. Mâni ditthlang theina huna um ei ni leiin hi khawvêl khela Krista lalram a taka a hung indin phâ ei thilthawhaiin mi zui pei a ta, ei um dan ding a la hril ding a nih.
Hla siemtuin, "Hun fe peihai Lalpa lovin khawlai am an um ta a?" a lo ti a, hun liem taa i hun hmanghai po po kha hang ngaituo sin la, Lalpa lova ni i hmang liem iengza'm um a ta? Mihriem hi ei hang buoi tak tak chu tuhai hlim amani ang elin "a Isu ei hriet phak nawh" a ni tak.
Kum thar ei hmasuon meka hin iengtin am hmang dingin inbuotsai a? Khawvêl khawsakna in sung i fepui nuom dan, i mimala sukpuitling i nuom dan tam tak hmathlir nei ngei i tih. Thlarau ramah ieng chen am tlung dingin inbuotsaia ti hi a pawimaw hle laiin ei nei naw rawp hlak hi a pawi a nih.
Lalram ropui, Krista lalram a'n din pha chun mi tinin tuta ei um angin mani nuomthuin hun hmang thei ta nawm ei nih. Lalpa mintlantu thuneina hnuoiah um tang ei ta, ama chu lal tak niin ro a rel ta ding a nih.
Chu hmuna chun chatuonin ei um ta ding a ni leiin chatuon hmuna ei insir ding thil ei thaw naw ding a nih. Hnuoia thil ei thawsuol ei insir ngawi ngawi hman an hawi naw chun, chatuonin insir pal ei tih ti inlâu a um hle. Hnung tieng ngaituo theina ei nei pal chun insir fe fe hi ei tam el awm deh!
Mihriemin sâwt ei ti hi chatuon hmun leh hrilkhi chun tawitie chau ding a ni leiin Krista lalram indin phaa ei ngîrhmun ding hi ei thlang fel a ṭûl a nih. Vanram kaihai khawma ei ngîrhmun ruok hi chu an ang vawng naw ding a nih ti Pathien thuin chîeng takin a mi hril. Taima lo, thaw ṭha lo lawmman dawng an um ngai nawh.
Thaw tam chun lâwm tam a ta, thaw tlawm chun a lawm tlawm el ding a nih. Pe tam chun lawmman hmu râwn a ta, pe tlawm chun lâwmman a hmu tlawm el ding a nih. Hnuoi inruolsieknaah result an puonga ei hmu tlawm leia ei inzak hi chu nêp tak ni'ng a tih.
Krista lalram hung indin phaa ei insir ding thil hi thaw tum nawng ei tiu. Umni khamin ṭawngṭâi inla khawm hun liem ta hnung kha chu kokir thei an' ta nawh. Tu huna inthawk hin inṭanin lalram ropui ei la tlung ding thlir zinga hringnun hmangin, ei thil neihai khawm chu lalram ep chun hmang inla nuom a um ngei deh. Vawisûna ei inrohai hi ei nei sawng ding pakhat khawm a um nawh.
Saruokin ei hung pieng a, saruok bawkin ei kir nawk ding a nih. Alexander ropui khawm kha rothil tam tak a lakkhawma chu, a thi khan; ka kuongah in mi zawn pha ka kut ve ve hi sie dawk ro, iengkhawm thlan khelah lutpui ding ka nei nawh ti mihaiin an hriet theina dingin, a tih. Khawvela hin iengkhawm ei lutpui naw a, iengkhawm ei suokpui naw ding ti hi second tina mi pathum pei thihai hin an sukchieng hle.
Aw, ama ringtu, a ta dinga inpe, harsatna khawm ama hming leia lo tuor rawntuhaiin Krista lalram indin phaa ei ngirhmun ding hi inhnar a va um awm ngei deh! Hnuoia hin chu mihai nei ang ei nei zo naw khawm a ni thei, mihai inbel ang ei inbel phak naw khawm a ni thei. Second hand hak seng seng khawm chanchinṭha leia haktu chun Krista lalramah a lawmna sukzuoltu lan chang ngei a tih. Hnuoia hman ei thlamuongna an thlau chun chatuon hmuna lem chu a van thlau awm deh! An chei nal nal hi lungril thlamuong anni chuong kher nawh.
Tukum Krismas ei hmang ding hin Krista'n ei hringnunah inlalna chang sien, einiah a lalram indin tirin, thuneina chang mawl sien nuom a va um ngei deh! Chuong ni sienla chu corona hripui kara khawm lungrilah lawmna thuruk nei ngei ei tih.
Ei khawvel hmang mek hi chîk taka suitu ta ding chun a beidawng um thlâk hle an tah. Hun sawt a riel khawm ring a um ta nawh. A lo la sâwt vieu a ni khawma nang le kei hi ei lungphu vawikhat an phu naw chun chatuon hmun ei direct nghal ding a nih. Ei vawikhat kalpen chau khawm hi thina thei vawng a nih.
Lungril chawlawla, thi lo ding ang ela hringnun hmang ding ei ni nawh. Ei hringna hi ei kuta um ang ela nuom nuom thaw a, nuom nuom dawn a, ui le ar ang ela khawsa ding ei ni nawh. Hringna siemtu hi la theitu a nih ti hi hre zing ei tiu.
Hmelṭhat leia damsawt ding ni sienla kum 300 dam ding khawpa hmelṭha an um, ana chu a ni naw si. Hausak leia damsawt ding ni sienla damsawt ding an tam el, ana chu an damsawng chuong nawh, an thi tho. Hmelsiet leia thi inhma ding ni sien la thi inhma ding an tam el, anâchu a hun nawa chu an thi chuong nawh.
Lawmna dinga i ngai zawngin inkhâwm hman lo rakin, ṭawngṭâi hman lo rakin, Bible tiem hman lo rakin tlan tlan la khawm lawmna tak tak a mi'n tlun chuong nawh. A hmu nawtu nuoi tam tak lo liem tahai enin var hun chu ei ni ta vei leh. Lâwmna tak tak chu Isu a chau a um.
Krista hi chatuon mi, bul le tawp nei lo a ni ang bawkin a lalram khawmin tawp ni nei naw ni a, a lien zuol deu deu ding a nih. Chuleiin lalram tawp ni nei lo Isu Krista hi zui ei tiu va, ama ta dingin hringnun hmang thar dingin inbuotsai rawh.