Delhi khawpuia hin Hmar țawng ziek dân indiktak hmanga thu le hla tienga insukhmasâwnna ding pawl indin nuomna hi mi țhenkhat lungrila hun sâwttak a inthawk khan a lo insieng tah a. Sienkhawm, hieng ang pâwl pawimaw indin hi nuom angrawkin a awl âi naw hle a, chuleiin, indin el thei lovin kum tȇl a liem a nih. Chuongchun, hun hung fe peiin tarik 4 Thlado (June), 2023 khan hieng tienga inhnikna nei mi mi 20 vȇl fekhawmin, Hmar Literature Society Delhi (HLSD) chu an lo indin ta a nih.
Chanchinbu (magazine / jounal) siem ding chun a hming ding ngaituo a țȗl hmasataka, a hming ding khawm hming pângngâi el ni lo, a chanchinbu thiltum, a thu fȗn dinghai le inhme ding hming a put a ngâi a nih. Hi le inzawm hin, HLSD țhuoituhai chu chanchinbu hming ding lungril le titakzeta ngaituoa hming pakhat bȇk pe lut seng dinga ngȇn an nih a. HLSD Executive Committee ințhung tarik 30, Thlahmur (July), 2023 khan nei a nia, hi ni hin E-jounal hming ding sâwng thuma relin siem fel a nih. A sawng khatnaa, e-journal hming ding pȇk lȗtna hun hawng a nia, hming 16 pȇk lȗt a nih. Hieng hming 16 hai hi a pe lȗttuhaiin journal hming dinga an ditnasanhai an hril seng bawk a nih. E-journal hming dinga pȇk lȗta umhai chu Hmar Arasi, Hnam Ro, Hrietna Buzem, Sekibusuok, Sikeisen, Thangkhawk, Tlangsam, Thu le Hla, Ţhuoitu, Ţobul le a dang an nih. A sâwng hnina ah, member tinhai chun hming 16 pȇk lȗta um laia mi țha an ti tak pathum pei an thlangsuoka, thlangsuoka umhai laia vote hmu insangtak pangahai thlangsuok nawk a nih. A sâwng thumna ah, hieng panga thlangsuoka umhai hi secret ballot hmanga hming pakhat chau seng ziek ding ti a ni nawka, chutaka chun memberhaiin lunginruoltakin ‘Ţobul’ ti chu e-journal hming dingin an thlangsuok a nih. Hieng hin member tinhai chu e-jounal hming thlang thua zalentaka mani dit thlangna hmang siin, a tam lem thuthlȗknaa rȇl a ni a nih.
Hmar thu le hla ziek, tiem le ngaihlut tieng hi pȇn khat te tea hma ei sâwn pei hi Ţobul chanchinbu thil tum le beisei chu a nih. Tiemtuhai Ţobul hi lo hlutsaka, a bâksam le hmasâwn peina ding kawngah ngâidân țhahai ei lâwmlut zing a nih ti mi lo hrie pȇk bawk dingin ei ingȇn takzet a nih.
